Rombak


“Presiden bakal ngerombak kabinet, ” katé Mat Kelor nyang abis bacé berité dari tanah air.

“Wah huebat. Ternyata pak SBY punya banyak ketrampilan, “ katé si Qodir.

“Itu sih bukan ketrampilan, DIr. Emang tugasnyé ! “ katé Mat Kelor nyang bingung kagak ngerti maksud si Qodir.

“Lho bayangkan saja, mas. Jadi pimpinan negara bisa, ikut perang, bisa. Pinter menyanyi, sekarang malah bisa merombak kabinet. Ndak gampang, itu mas. Musti tepat ukurannya. Kalau tidak, berantakan semuanya, “ katé si Qodir lagi. “Sebenarnya pak presiden kan bisa saja suruh orang. Tapi dasar orangnya rajin, dikerjakan sendiri. “

“Maksud lu apaan sih, Dir ?” tanyé Mat Kelor nyang makin bingung, sebab omongannyé si Qodir kagak nyambung.

“Ya, itu tadi mas. Merombak kabinet kan musti perlu ketrampilan khusus. Kalau buat dari baru, lebih mudah. Tapi kalau sudah ada dan dirombak, supaya lebih bagus. Itu sulit, “ katé si Qodir sok tauk. “Perlu mengerti ukur-mengukur, memotong, menggergaji, menggunakan palu dan lain-lainnya. “

“Astaga, Dir ! Itu sih kabinet nyang artinyé lemari buat nyimpenin barang-barang atawa surat-surat penting. Ini maksudnyé kabinet entu susunan pembantu-pembantunyé presiden alias menteri-menteri. Dirombak, maksudnyé nyang kagak becus, diganti amé orang baru, “ katé Mat Kelor sambil ngakak.

“O, tak pikir lemarinya pak presiden rusak, jadi dirombak sendiri, “ saut si Qodir nyantai tanpé dosé.

“Lha mau dirombak gimané jugé kagak bakalan beres-beres negaré kité, Mat, “ celetuk si Pepen nyang baru keluar dari kamar. “Nyang dipilih bukannyé orang nyang ahli di bidangnyé, tapi orang parpol nyang bisényé ngomong doang, kerjé sih kagak. “

“Ngomong kan kerjé jugé, Pen. Kalo mau nyari nyang bisé kerjé tapi kagak bisé ngomong, pilih ajé orang bisu, “ katé Mat Kelor ngeledekkin si Pepen.

“Barangkali mendingan gitu, Mat. Sepi tapi hasilnyé keliatan. Daripadé ramé tapi kagak adé hasilnyé ampek sekarang, “ bales si Pepen nyang mingkinan pesimis. “Kité merdeka duluan tapi Malaysia nyang dulu taon 60-an ngirim mahasiswényé belajar di negaré kité, sekarang ekonominyé jauh lebih maju daripadé kité. “

“Abisnyé kité kagak berenti-berentinyé mau ngerombak ini-itu. Semuényé dirombak. Gedong-gedong peninggalan Belandé, chinatown, semuényé dirombak,dibikin bangunan moderen. Kalo dipugar, masih bisa narik pelancong dari negaré laen. Tapi kalo bangunan moderen ? Di negaré laen banyak nyang lebih bagus, “ katé Mat Kelor.

“Betul mas, pendidikan juga sama. Dulu mulai sekolah awal tahun, terus dirombak sistemnya jadi tengah tahun. Dulu menteri memimpin departemen, sekarang kementrian. Padahal kalau pemimpin pemerintahannya Perdana Menteri seperti di Malaysia atau Jepang, pembantunya menteri-menteri. Kalau pemimpin pemerintahannya Presiden, seperti di Amerika, pembantunya namanya sekretaris, “ katé si Qodir nambahin.

“Istilahnyé mau bangun gedong, belon jadi dirombak lagi, dirombak lagi. Kapan kelarnyé entu gedong ?” katé si pepen sambil terkekeh-kekeh.

“Kayak Michael Jackson dong, tuh muké kebanyakan dirombak akhirnyé bukannyé jadi ganteng, malahan kuntilanak ajé takut ngeliat dié !” ceteluk Mat Kelor sambil ketawa kebahak-bahak.

Digg This
Reddit This
Stumble Now!
Buzz This
Vote on DZone
Share on Facebook
Bookmark this on Delicious
Kick It on DotNetKicks.com
Shout it
Share on LinkedIn
Bookmark this on Technorati
Post on Twitter
Google Buzz (aka. Google Reader)

Leave a Reply

Your email address will not be published. Required fields are marked *