Sikut

“Pen, tumben gini ari lu udah pulang ?” tanyé Jumadi nyang ngeliat si Pepen datang.

Belon sempet si Pepen ngejawab, Qodir nyang duduk deket pintu masuk sontak tanyé ke si Pepen, ngeliat matényé nyang mateng kayak abis maen tinju. “Lho mas, kenapa matanya ?”

“Mangkényé lu jangan sembarangan colak-colek anak perempuan orang. Kena deh tuh maté, diberi amé babényé !” katé Mat Kelor ngegodain si Pepen.

“Sia’ul lu, Mat. Adé pasien gue nyang barangkali obatnyé disumpetin kagak diminum. Mangkényé angotnyé kumat. Lagi gue urusin malah maté gue kena sikutnyé. Amé supervisor gue disuruh pulang cepet, ” katé si Pepen ngenes.

“Biar aman, laen kali kalo kerjé lu jangan lupa pake helem !” samber Mat Kelor sambil ngakak.

“Resiko kerjé jagain orang yé gini. Kalo pasien nyang kena sikut kité, langsung kité dikeluarin. Tapi kalo kité nyang sial, udé disuruh pulang, gaji kena potongan !” katé si Pepen lagi.

“Yah kagak seberapé gede, Pen. Dipotong sejam-dué jam kagak gitu sakit. Pemain tengé-nyé Lakers si Andrew Bynum ilang duitnyé 250 rebu garé-garé nyikut pemain Minnesota. Diskors 2 pertandingan kagak dibayar, ” katé Jumadi nyang ngefans banget amé Lakers.

“Lho itu pelanggaran berat, mas. Wong main basket kok pakai sikut ? Kan bahaya. Sikut kan keras !” protes si Qodir.

“Nenek-nenek jugé tauk, Dir kalo sikut entu keras. Nyang emnpuk tuh tape !” celetuk Mat Kelor sambil cekakakan.

“Kalo di pelem silat, orang ngehajar paké sikut tuh pas pengabisan, kalo lawannyé udé setengé koit. Abis disikut langsung deh kembali ke alamnyé, ” katé si Pepen nyang doyang nonton pelem silat.

“Kalo di pelem silat nyang paling gue demen gayé kodok, Pen. Biasényé nyang gapé tuh nyang badannyé kuat. Dipukulin kayak apé ajé kagak mempan, ” katé Jumadi nyang kadang ngikut nonton pelem silat kalo keabisan pelem Indihé.

“Nah Jum, kalo orang kité laen lagi. Justru nyang loyo nyang biasényé maké jurus kodok !” katé Mat Kelor sambil mesem-mesem.

“Wah mané bisé, Mat ?” protes si Jum. “Kalo badannyé kagak sterek mané bisé dié pake itu jurus ? Ditabok sekali bisé celeng !”

“Bukannyé di dunié persilatan, Jum. Tapi di dunié nyaté, ” katé Mat Kelor ngelurusin maksud omongannyé. “Supayé maju kariernyé atawa usahényé, orang kité pake jurus kodok.”

“Maksud lu, Mat ?” tanyé Jumadi nyang masing belon ngerti maksudnyé Mat Kelor.

“Balik lagi soal sikut tadi, Jum. Lu tauk kan kebiasaan kodok kalo berenang, tangannyé nyikut kiri-kanan. Nah biar maju terus, orang tipe begini biasényé nyikut kiri-kanan. Siapé nyang kiré-kiré bakal bisé nyaingin dié atawa punyé modal ketrampilan nyang samé buru-buru disikut biar jatoh duluan, ” katé Mat Kelor kalem.

“Oh gitu, maksud elu, Mat, ” katé Jumadi nyang mulain ngerti.

“Bukan itu ajé, Jum. Kodok kalo berenang kan kakinyé nendang-nendang. Nah, orang di bawah dié nyang suatu saat bisé menonjol, buru-buru ditendang atawa diinjek biar mandek ajé di bawah, kagak bakalan naek-naek, ” katé Mat Kelor lagi.

“Bener lu, Mat. Banyak tuh orang kité nyang model begitu, ” katé si pepen ngedukung omongannyé Mat Kelor.

“Masih adé lagi, Pen. Kodok tuh lidahnyé suké ngejulur-julur. Nah orang model gini, seneng ngejilat orang-orang nyang bisé bikin dié jayé, ” katé Mat Kelor nambahin lagi.

“Nah pertanyaannya, bagaimana menghadapi orang seperti ini, mas ?” tanyé si Qodir sambil nyaplok singkong rebus nyang adé di atas mejé.

“Kodok kan musuhnyé uler, Dir ! Mangkenyé musti pake jurus uler. Diem-diem kité musti deketin. Nah kalo si kodok lengah, langsung kité caplok. Persis kayak jurus elu tadi. Nyang laen asyik ngobrol elu sih enak ajé terus-terusan nyaplokin singkong !” katé Mat kelor sambil ketawa kebahak-bahak.