“Wuah, ada-ada saja. Mosok sekarang filem asing dilarang beredar di Indonesia !” katé si Qodir sambil
nutup fesbuknya. Rupényé dié abis bacé propil-propil fesbuk temen-temennyé di Indonesia.
“Hus, jangan sembarangan ngomong, Dir. Bukan dilarang beredar. Tapi ditarik peredarannyé, ” katé Mat
Kelor. Emang kalo jadi orang Indonesia kité musti pake istilah yang tepat, biar sebenernyé artinyé sih
samé ajé.
“Ya, pokoknya tidak ada lagi, mas. Importir teriak karena bea masuknya dinaikkan, ” katé si Qodir lagi.
“Bukan dinaikkin, Dir. Bea masuknyé sih tetep, cuma dulu kan importir kagak masukkin nilai royaltinyé.
Nah sekarang bea masuk jadi gede, sebab nilai royaltinyé musti itung !, ” katé Mat Kelor niruin gayé
ngomong pejabat kité. Muter-muter tapi buntut-buntutnyé naek !
“Tapi kata bung Deddy Mizwar, tidak fair, mas. Selama ini pajak filem nasional lebih tinggi dari bea
impor film asing, ” tambah si Qodir lagi.
“Ya kagak bisa disamain dong, Dir. Yang satu kan pajek atas biayé produksi. Yang satunyé lagi bea
masuk impor. Kalo film asing mau dikenain pajek 10% atas biayé produksi, berarti importir filem Avatar
musti bayar 10% dari 280 juté dollar. Berarti orang kité kalo mau nonton pelem impor musti bayar berapé
juté, satu tiketnyé ? Gimané sih bang Deddy ?” katé Mat Kelor sambil terkekeh-kekeh. “Kalo produsen
pelem nasional ngerasé pajeknyé kegedean, yé minta diturunin. Kagak adé urusannyé amé bea masuk
pelem impor.
“Bener, Mat. Persaingan musti fair dong. Kalo kité bisa bikin pelem-pelem jempolan, pasti orang kité
bakal ramé-ramé nonton filem nasional. Ngapain lagi nonton bule kebut-kebutan di jalan amé tembak-
tembakan. Kan kagak realistis amé kondisi kité, Di Jakarté ngimpi kali bisé kebut-kebutan di jalanan.
Apalagi tembak-tembakan. Pestol nyang legal mané adé ? Selepetan tuh baru legal !” katé si Pepen sambil
nyengir. “Musti lebih kreatif dong, orang-orang kité. Kayak bule, bikin pelem temanyé macem-macem.
Kalo kité bisényé bikin pelem esek-esek amé horor doang !”
“Kalo soal cerité kité emang kalah kreatip, Pen. Tapi kalo soal judul, kité jauh lebih kreatip daripadé bule.
Lu liat ajé judul pelem-pelem kité. Nyang pelem horor, adé Suster Ngesot, Darah Janda Kalong Wewe,
Suster Keramas, Hantu Puncak Datang Bulan, Hantu Binal Jembatan Semanggi, ” katé Mat Kelor sambil
ngakak. “Belon lagi pelem nyang nyerempet-nyerempet, judulnyé Buruan Cium Gue, Psst Jadikan Aku
Simpanan, Maaf Saya Menghamili Istri Anda, Mengejar Mas-Mas. Adé lagi nyang judulnyé Mendadak
Dangdut !”
“Itu sih bukannyé kreatip tapi norak, Mat ! ” katé si Pepen sambil ngakak. “Nah bikin pelem horor ajé
kité kurang kreatip. Hantunyé ari dulu ampek sekarang kalo kagak kuntilanak, pocong, gederuwo amé
tuyul ajé. Kalo bule lebih kreatip. Vampir ajé adé nyang mukényé jelek kayak Nosferatu, tapi adé nyang
ganteng-ganteng kayak di pelem Twilight. Adé nyang jahat, adé jugé nyang baek, kagak pernah nyusahin
orang idup. ”
“Barangkali sebab orang kité kebanyakan idupnyé bikin susah orang laem melulu, Pen. Mangkényé
udé mati, jadi hantu jugé masih nyusahin orang idup !” katé Mat Kelor sambil ketawa kebahak-
bahak. “Mangkényé gué adé rencané pulang kampung mau bikin perusahaan pelem khusus produksi
pelem horor nyang jempolan. Dari sini gue mau bawa beberapé zombie, werewolves amé vampir !”
“Busyet, pegimané nangkepnyé, Mat ?” tanyé si Pepen ngegodain sohibnyé.
“Nangkepnyé sih gampang. Nyimpennyé nyang radé berabé. Apélagi zombie, cepet busuknyé, ” bales
Mat Kelor sambil ngakak.
“Maké itu jangan lupé bawé dry ice dong, Mat, ” bales si Pepen.
“Nah itu dié masalahnyé. Gue suruh si Qodir beli es kering di warung, eh malahan dié beli es balok. Terus
dijemur di parkiran. Biar kering katényé !” katé Mat Kelor sambil ketawa kebahak-bahak.
Related Posts
