Demam Pialé Dunié


Si Qodir bingung. Bangun tidur pagi-pagi ngeliat si Pepen udéh nangkring melototin teve. Biasanyé jam segini si Pepen udéh berangkat kerjé. Tambahan bingung lagi di sebelahnyé ternyaté adé Mat Kelor amé Jumadi.

“Lho kok ndak biasanya semua ada di rumah pagi hari. Apa mas-mas ini sudah dipecati semua dari pekerjaannya berhubung ekonomi sedang sulit ?” tanyé si Qodir nyang mulutnyé emang kebiasaan asal njeplak, gak mikir orang bisa kesinggung.

“Gue kan emang lagi off, Dir, ” jawab Mat Kelor nyantai. “Tuh si Jum barusan telepon tempat kerjaannyé, bilang kagak enak badan. Beneran kemasukan angin duduk baru nyaho deh. ”

“Gue sebulan ini minta tukeran jam kerjé, Dir. Biasanyé gue kerjé siang, tapi gue udéh minta amé bos masup malem ajé sementaré, ” katé si Pepen nyang nyerocos tapi matényé lengket ke layar teve.

“Kelihatannya asyik betul semuanya nonton teve. Apa ada acara khusus ? Barangkali pidato presiden Obama mau memberikan amnesti, ” tanyé si Qodir sambil ngarepin dalam ati, siapé tauk bener. Kalo bisé jadi wargé negaré  Amerika kan bakalannyé bisé narik si Nunung, tunangannyé pindah ke sini.

“Terlambat lu, Dir. Itu sih udéh semalem, ” katé  Mat Kelor sambil cengengesan. “Tapi nyang dapet amnesti bukannyé elu. Penjahat-penjahat nyang dapet pengampunan. Biar penjaré sepi, kagak usah ngasih makan gratis. ”

“Daripadé mulut lu ngablak ajé kagak berenti ngomong, mendingan mari duduk sini, Dir. Kité nonton bola barengan, ” katé Jumadi nyang takut keganggu, sebab bentaran lagi pertandingan bakalan dimulaiin.

“O pantes pada ndak kerja. Rupanya mas-mas ini kena demam piala dunia. Persis seperti di pesbuk, semua statusnya penuh dengan obrolan soal piala dunia, ” katé si Qodir nyang baru ngerti.

“Namanyé juga orang Indonesia, Dir. Sepakbola tuh nyang paling nomor satu. Biar katé kompor kagak ngepul, nyang penting nonton bola, ” katé si Pepen sambil terkekeh-kekeh.

“Lha wong timnas Indonesia tidak lolos kualifikasi piala dunia, mau dukung siapa ? Prestasi kita masih terseok-seok biarpun cuma di lingkungan Asia Tenggara, ” katé si Qodir lagi sambil ngambil tempat duduk di sebelahnyé si Jum.

“Yah dukung negaré mané ajé kan bolé, Dir. Kagak harus negaré sendiri. Kemarin kité ngedukung Lakers. Padahal di Lakers kagak adé orang Betawinyé, ” katé Mat Kelor sambil ngikik. “Jaman dulu kité pernah jayé, Dir. Waktu masih jaman Belandé dan masih pakek namé Hindié Belandé, di taon 1934, kesebelasan Jepang kité gundulin 7-0. Empat taon berikutnyé kité lolos kwalifikasi pialé dunié, dan ikut maen di pialé dunié di Prancis. ”

“Lho setelah merdeka kok prestasi kita bukannya semakin berjaya, tetapi malah sontoloyo, ya mas ?” tanyé si Qodir bingung lagi.

“Orang kité emang kalo ngurusin apé-apé masih kurang pinter. Nyari prestasi susahnyé setengah mati, tapi kalo nyari duit cepet, ” katé si Pepen sambil ngakak.

“Masalahnyé tim sepakbola kité larinyé kurang cepet. Kalah kalo adu lari amé orang asing. Mustinyé bang Mi’un tukang sado nyang diangkat jadi pelatih timnas, ” katé Mat Kelor sambil senyum-senyum bandel.

“Emangnyé bang Mi’un jago maen bola, apé gimané Mat ?” tanyé si Jum nyang tekaget-kaget dengerin idenyé Mat Kelor.

“Bang Mi’un punyé cara jitu supayé kudanyé lari kenceng. Nah pasti bagus kalo diterapin ke tim sepakbola kité, ” katé Mat Kelor sambil cengengesan.

“Pegimané carényé, Mat ?” tanyé Jumadi lagi penasaran.

“Bokongnyé diolesin sambel terasi !” jawab Mat Kelor sambil ketawa kebahak-bahak.

Digg This
Reddit This
Stumble Now!
Buzz This
Vote on DZone
Share on Facebook
Bookmark this on Delicious
Kick It on DotNetKicks.com
Shout it
Share on LinkedIn
Bookmark this on Technorati
Post on Twitter
Google Buzz (aka. Google Reader)

Leave a Reply

Your email address will not be published. Required fields are marked *