Takut si Nunung, tunangannyé diaget orang kalo kelamaan ditinggalin ngerantau, Qodir mikir-mikir pulang apé jangan. Diitung-itung sih tabungannyé udah lumayan buat modal dagang di kampungnyé. Tapi masih berat rasanyé, kepengennyé sih nyang lamaan lagi biar mangkinan gedé tuh duit. Selamé belon disatronin amé pulisi ICE, biarin deh tetep ngendon ajé di Amrik. Apalagi di Kalipornia masih legaan dikit dibanding amé negara bagian tetanggé, nyang udah mulain galakkan amé orang-orang modelnyé si Qodir. Modal dapet inpormasi dari Mat Kelor nyang pernah make jasa agen perjalanan, Qodir nekad datengin itu kantor buat tanyé-tanyé.
“Met pagi, bang ! ” sapé si mpok bagian terima tamu di konter depan, nyang ternyaté orang Betawi. “Abang adé rencané pulang kampung ?”
“Lho saya salah masuk kantor, tho mbak ? ” tanyé si Qodir kebingungan.
“Emangnyé abang mau ke kantor siapé ? ” katé si mbak balik nanya, ikutan bingung.
“Ini tempatnya juru ramal seperti mama Lauren ya mbak ? Bahasa Inggrisnya psychic, atau apa ya ?” tanyé si Qodir sambil celingukan.
“Masya Allah, bukan, bang ! Ini agen perjalanan nyang buat mesen karcis kapal terbang. Kalo tukang ramal noh di seberang, ” jawab si mpok sambil nunjuk ke seberang jalan.
“Wah tak kira tukang ramal, é mbak. Soalnya kok langsung tahu kalau saya mau pulang kampung, ” katé si Qodir polos.
“Bukannyé jago ramal, bang. Semué nyang dateng ke sini, biasanyé nyang padé mau pulang kampung. Masa mau beli témpé ?” katé si mpok sambil cekikikan. “Ngomong-ngomong kapan, bang, rencananyé ?”
“Lho, baru kenal sebentar kok sudah tanya-tanya rencana saya ? Lha wong saya dan tunangan saya saja belum memastikan tanggal perkawinannya lho mbak !” katé si Qodir radé kurang seneng.
“Ya ampun, bang. Ayé bukan nanyain tanggal eng-ing-eng-nyé situ, ” katé si mpok sambil geleng-geleng kepalé. “Nyang penting tanggal berangkatnyé, kapan ?”
“Mau nitip, ya mbak ? Tanya-tanya kapan saya pulang !” katé si Qodir lagi. Maklum deh kebiasaan nitip tiap kalo adé nyang pulang, jadi giliran dié nyang mau pulang bawaannyé curigaan duluan.
“Buju busyet, bang. Bukannyé mau nitip, tapi hargé karcisnyé tergantung kapan mau perginyé, ” katé si mpok antaré sebel amé nahan ketawé.
“Ya dicarikan yang paling murah saja, mbak, ” katé si Qodir nyang mulain ngerti omongannyé si mpok.
“Mau naek SQ, bang ?” tanyé si mpok lagi.
“Bukan ! Naik pesawat terbang saja, mbak !” katé si Qodir.
“Yé, si abang ! SQ itu pesawat, artinya Singapore Airlines !” celetuk si mpok sambil cekikikan lagi.
“Mbok ya bilang yang jelas. Tak kirain SQ itu ya aku sendiri lho mbak, Si Qodir, ” katé si Qodir sambil senyum-senyum.
“Oh si abang naményé Qodir ya ? Kalo ayé Ida, ” katé mpok Ida, “Kalo nyang murahan adé tuh Eva Air. ”
“Jangan, mbak Ida. Nanti tunanganku cemburu. Lebih baik Adam Air saja !” katé si Qodir khawatir.
“Adam Air adényé di laut Sulawesi, bang !” samber mpok Ida sambil ngakak.
Abis ilang ketawanyé mpok Ida nanya ke si Qodir, “Karcisnyé cuma buat sendirian, bang ?”
“Wah mana kuat pesan satu pesawat untuk sendirian saja, mbak ? Ya maunya ramai-ramai, begitu, biar tidak mahal, ” katé si Qodir nyantai.
“Iyé nanti berangkatnyé bareng-bareng, bang. Tapi maksud ayé beli karcisnyé di sini buat abang ajé, kagak ngajak orang laen ?” katé mpok Ida lagi nyang udah sakit perut ketawa mulu dari tadi.
“Ya sudah, mbak. Pokoknya saya beli karcis satu yang paling murah. Tanggal berangkatnya kosongkan saja. Nanti kalau saya mau pergi tinggal langsung datang saja ke bandara, ” katé si Qodir nyang capek ditanyain ini-itu mulu.
“Kagak bisa dong, bang. Emangnyé karcis bis kota, kagak adé tanggalnyé !” katé mpok Ida nyang kagak kuat lagi nahan ketawé.
Related Posts
