“Mas Mat, itu kampanye untuk pemilu Kalifornia tanggal 8 Juni nanti koq semakin ramai ya. Kelihatannya semakin panas, “ katé si Qodir abis ngeliat iklan di teve.
“Jelas makin panas, Dir. Kan sekarang udah musin semi, bentar lagi musim panas, “ celetuk si Pepen.
“Maksudnya itu lho saling hujat menghujat, mengungkapkan kejelekan lawannya, “ protes si Qodir.
“Wah, kalo saling muji lawannyé, bukan kampanye dong. Itu sih biasanyé abis pertandingan tinju, “ samber si Pepen sambil terkekeh-kekeh.
“Apa ndak bisa dituntut, kalau menjelekkan nama orang lain ?” tanyé si Qodir kepengen tauk lebih banyakan lagi.
“Di sini beda, Dir. Emangnyé di sono, giliran boroknyé dibeberin, langsung padé menuntut di pengadilan ? Katényé pencemaran namé baek. Namé sih emang baek, kelakuan nyang tercemar, “ jawab si Pepen sambil ngakak. “Lagian di sini, kagak sembarangan ngomong, semuényé adé buktinyé. “
“Nyang ditanyé gue, nyang nyaut elu terus, Pen. Kayak maling jemuran, nyamber terus, “ katé Mat Kelor nyang dari tadi kagak sempet ngomong. “Biasé, Dir. Makin deket arinyé, makin jor-joran padé ngabisin duit nyang udah kekumpul. “
“Lho katanya ada calon legislatif dan eksekutif yang sampai keluar uang dari kantong sendiri ?” tanyé si Qodir lagi.
“Hartanyé dimakan tuju turunan juga gak bakalan abis, Dir. Banyakan politisi kan emang udah padé banyak duit dari sononyé. Kalo gembel kayak kité jangan ngimpi deh jadi politisi, “ katé Jumadi sambil nyengir.
“Memangnya kalau jadi politisi bisa tambah kaya, tho mas ?” tanya si Qodir lagi nyang sebenarnya bukan minat pengen tauk masalahnyé Tapi kan gayé kalo pulang kampung nanti bisa ngecoblak soal politik di Amrik.
“Di sono sih iyé, Dir. Mangkényé banyak nyang padé jadi sinting, udahan keluar banyak duit buit mancing jabatan, eh buntut-buntutnyé kagak kepilih, “ katé si Pepen sambil cekakakan.
“Banyak calon politisi kagetan nyang mikirnyé orang kampung masih padé bego. Asal dibagiin duit amé sembako, pasti bakalan milih dié. Duitnyé sih mau, sembako diterimé. Giliran milih, ogah ah, “ tambah Mat Kelor sambil ikutan ngakak. “Emangnyé anak ingusan, bisé disuap amé permen ?”
“Kalo di sini sih politisi pendapetannyé jauh dibanding amé nyang terjun di bisnis, Dir. Presiden ajé gajinyé cuma berapé ratus ribu dollar doang. Kalo elu jadi presdir di perusahaan ngetop, gajinyé bisé puluhan milyar dollar setaonnyé, “ katé Jumadi.
“Lho jadi kenapa koq orang seperti Meg Whitman dan Carly Fiorina yang sudah malang-melintang di dunia bisnis, mau terjun ke politik, ya mas ?” tanyé si Qodir lagi lebih daleman.
“Yang kayak gitu sih udah padé kagak perlu duit lagi, Dir. Duitnyé udah kebanyakan. Mangkényé padé kagak segen-segen ngeluarin dané kampanye dari kocek sendiri, “ jawab si Jum kalem. “Sesuai sipatnyé manusié. Kagak adé puasnyé. Duit udah banyak, sekarang nyang dikejar popularitas amé kekuasaan. “
“Bisé bener tapi bisé salah, Jum. Mungkin ajé alesanyé terjun ke politik bukan karné itu. Kali ajé atinyé padé pegel ngeliatin politisi aseli nyang sering padé kagak tauk diri. Ngeluarin duit rakyat seenak jidatnyé sendiri, kayak bandé kakek-moyangnyé ajé, “ katé Mat Kelor sambil senyum-senyum. “Nah, barangkali ajé malahan bagus buat Kalifornia, punya politisi nyang mantan eksekutip teras di perusahaan-perusahaan gede. Mereka kan biasé ketat soal anggaran, apalagi Kalifornia sekarang bujetnyé udah kecekek banget.”
“Ah kalo situasi kayak sekarang, mustinyé nyang terjun ke politik di sini, anak Betawi kayak elu, Mat. Orang Betawi, biar kantong cekak, becandé jalan-terus. Biar duit susah, negaré miskin, rakyat padé nyengir terus, “ katé si Pepen sambil ketawa kebahak-bahak.
Related Posts
