Si Nunung, tunangannyé si Qodir, ngerayu si Qodir terus supayé dibeliin komputer. Alesannyé sih supayé gak usah jauh-jauh ke warnet, kalo mau internetan. Emang bener sih, kalo masih pacaran, saatnyé minta dibeliin ini-entu. Kalo udah kawin, belum juga tuh mulut sempet celangap udah dibentak duluan.
Si Qodir naményé sayang amé tunangan, langsung ajé nyari tauk model apé nyang kudu dibeli. Kalo komputer meja, pasti manyun nyang mau dititipin, sebab bisa makan tempat sekoper sendiri. Pilihannyé nyang bisa ditenteng-tenteng, praktis ! Padahal dié lupa rumah bakal mertuanyé kagak adé saluran telepon. Mau disundut di mané tuh komputer ? Listrik ajé byar-pet mulu, banyakan maké lampu templok kalo malem. Berhubung nyang paling ngerti soal komputer Mat Kelor, Qodir langsung nyamperin, mau dapet inpormasi.
“Mas, aku mau beli komputer buat Nunung, tunanganku. Kebetulan mas Sastro kan mau mudik, bulan depan. Saran mas, apa ya, yang aku beli ?” tanyé si Qodir buka omongan.
“Nyang paling baru sih iPad, keluaran Apple, Dir. Tuh sodaranyé iPod amé iPhone. Cuman gue radé khawatir, kalo elo beliin sih Nunung nyang model begituan, ” jawab Mat Kelor nyantai.
“Lho, memangnya kenapa, mas ?” tanyé si Qodir lagi.
“Takutnyé dikirain talenan, amé enyaknyé si Nunung. Salé-salé dipake buat alas motong tempe, pegimané ?” katé Mat Kelor sambil ngakak.
“Wah betul itu, mas. Kalau notebook bagaimana ?” tanyé si Qodir sambil nyecer Mat Kelor.
“Elu nanya, apé interogasi, Dir ? Semangat amat. Kayak gue maling ayam lagi ditanyain pulisi, ” katé Mat Kelor sambil terkekeh-kekeh. “Notebook sih kekecilan, Dir. Si Nunung kan orang tani. Pasti jempol amé jari-jarinyé gede-gede. ”
“Hus, memangnya keturunan genderuwo, mas !” katé si Qodir sambil cengar-cengir. Marah sih kagak, namanyé ajé lagi perlu amé Mat Kelor. “Tapi benar juga, notebook kan tidak ada tempat CD-nya. Lebih baik yang ada, jadi aku bisa kirim DVD sekali-kali, biar Nunung bisa melihat keadaan mas-é di rantau.”
“Ya udah lu beliin laptop ajé, Dir. Tapi jangan nyang merek Apple, ” katé Mat Kelor lagi.
“Lho, memangnya merek Apple ndak bagus, tho, mas ?” tanyé si Qodir kebingungan.
“Bagus sih, Dir. Tapi orang desa kan kagak doyan apel. Palingan makannyé timun tiap ari. Kan kagak ada komputer merek mentimun, ” katé Mat Kelor sambil ngakak lagi.
“Ah si mas, ini bercanda terus. Jadi enaknya beli yang apa, ya mas ?” katé si Qodir nyang masih serius ajé bawaannyé.
“Beli nyang windows 7 tuh nyang paling baru, ” katé Mat Kelor mulain serius.
“Kenapa, mas. Biar adem yah, yang jendelanya ada 7 ? Ya maklum Bantul itu udaranya panas, ” katé si Qodir polos.
“Dir, windows 7 tuh namé program di dalemnyé. Lagian komputer mané adé jendelanyé ? Lu kira rumah susun ?” katé Mat Kelor sambil terbahak-bahak. “Nah mesinnyé tuh adé nyang AMD, atawa intel. Terserah elu deh mau pilih nyang mané.
“Apa ndak ada yang sipil, mas. Kalau berbau militer, orang desa suka takut. Dua-duanya itu bikin orang desa tidak mau pakai. Yang satu intel, eh yang satunya lagi Abri Masuk Desa !” katé si Qodir setengé was-was. “Nanti dikira mau makar, wah bahaya !”
“Kalo gitu elu beli aja komputer bikinan Tiongkok, Dir. Prosesornya merek dragon, jadi aman, ” katé Mat Kelor sambil ketawa geli. “Lagian listriknya sama-sama 220, Dir. Kalo nyang di sini kan masih 110. ”
“Wah mas, kalau dragon, nanti dikira pompa air, bukan komputer, ” katé si Qodir ngeyel. “Iya lah kalau yang 110 nanti dikira aku pelit, belikan tunangan kok yang separo harga. ”
“Mendingan sono gih, lu ganti baju. Kité samé-samé ke toko komputer. Nanti gue tinggal tunjukkin. Nah elu tinggal pilih deh mané yang lu suka, ” katé Mat Kelor gemes.
“Dari tadi juga maksudnya begitu, mas, ” katé si Qodir cengengesan sambil ngeloyor.
Related Posts
