Arizona


“Nanti akhir bulan kan adé liburan panjang, gara-gara hari Senennyé Memorial Day. Enakan kité jalan-jalan ke mané yé ?” tanyé Mat Kelor sambil ngebolak-balik kalender.

“Mau ke mané ? Palingan nyang deket ke Stater Bros, Walmart apé Target, ” katé si Pepen asal jeplak ajé mulutnyé.

“Itu sih belanjé, bukan jalan-jalan, Pen !” bantah si Jum. “Yah, nyang deket, murah, enak, ke Las Vegas ajé kayaknyé.”

“Gak ah. Kalo kagak kuat iman, pulang-pulang cuma modal celana kolor doang, ” katé Mat Kelor sambil ngakak.

“Ya udah kité ke pantai ajé, nyantai !” katé si Pepen ngusulin. Emang maunyé. Banyak pemandangan soalnyé kalo di pantai.

“Gak ah, gue takut item, ” katé Mat Kelor singkat.

“Busyet, kulit lu udah kayak kuli Priok, mau tambah item gimané lagi ?” celetuk si Pepen sambil ngakak.

“Daripada repot-repot, lebih baik kita jalan-jalan ke Arizona saja mas. Suasananya kan pasti lain daripada di Kalifornia, ” katé si Qodir ngusulin.

“Bener, Dir, laen. Lewat perbatesan dikit, elu langsung dicomot, dijeblosin ke penjaré, gara-gara surat-surat elu kagak komplit, ” katé si Pepen, nakutin si Qodir.

“Justru peraturan barunya belum berlaku sampai bulan Agustus nanti, yah justru itu kesempatan kita untuk main ke sana, mas, ” katé si Qodir lagi.

“Bener juga, Dir. Agustus nanti bahayé kalo kité ke sono, jangan-jangan kité disangkain orang Meksiko ?” katé Jumadi khawatir.

“Jum, pulisi sih mané mungkin nyangkain elu orang Meksiko ? Boro-boro mirip, nyerempet ajé kagak !” katé Mat Kelor sambil ketawa kebahak-bahak.

“Ah, bule ajé suka nyangkain gue orang Meksiko, ” bantah si Jum serius.

“Barangkali bule nyang matanyé jereng, ” samber Mat Kelor sambil ngakak lagi.

“Kalo ampek jadi kité pergi ke sono, kité musti ngisi bawa makanan dari sini, sedapet mungkin jangan belanjé di sono, amé penuhin tangki mobil di pom bensin di Kalifornia, ” katé si Pepen serius.

“Lho memangnya kenapa, mas ? Memang mata uang di Arizona bukan dollar ?” tanyé si Qodir kebingungan.

“Bukan, Dir. Itu kan nyang bilang Joe Baca, anggota kongres asal San Bernardino. Kité musti solidaritas dong, ” jawab si Pepen.

“Ajé gilé, apényé nyang musti solidaritas. Emangnyé kalo kité dapet kesusahan Joe Baca mau nulungin ?” protes si Jum.

“Lagian hargé bensin di Arizona bisa murahan 20 sampek 30 sen per gallonnyé. Emang beda harganyé Joe Baca mau talangin ? Kalo bisa, kité atur, biar bensinnyé pas cukup sampek lewat perbatesan dikit. Jadi kité bisa ngisi penuh-penuh di Arizona. ” katé Mat Kelor sambil cengengesan.

“Bukan soal tulungin apé talangin. Masalahnyé hukum imigrasi di Arizona itu rasis. Kalo tampang kayak orang Hispanik, pulisi langsung nanyain surat-surat. Itu kan namanyé rasis !” katé si Pepen sewot.

“Itu kan alesannyé aktifis orang Hispanik ajé, Pen. Elu jangan gampang kepengaruh dong. Mané mungkin sih, pulisi bakal nanyain surat-surat garé-garé cuma ngeliat tampang orang doang. Orang Hispanik kan banyak banget di Arizona. Abis waktunyé tuh pulisi di sono dong, kalo tiap ketemu orang nyang tampangnyé Hispanik, musti ditanyé-tanyé, ” katé Jumadi. “Pulisi kan kagak  bego, Pen. Nyang dicurigain orang nyang grogi kalo ketemu pulisi atawa langsung ngumpet kalo ngeliat adé pulisi. ”

“Wah kalo gitu nyang  paling bahayé bukan orang Hispanik tapi orang kité dong Jum ?”  katé Mat Kelor sambil nyengir.

“Emangnyé kenapé, Mat ” tanyé si Jum kebingungan.

“Orang kité, mau orang gelap atawa punyé surat sama ajé. Kalo papasan amé pulisi, biasanyé celingak-celinguk terus ngilang. Soalnyé bawaan dari sono, jiper amé pulisi !” katé Mat Kelor sambil ketawa kebahak-bahak.

Digg This
Reddit This
Stumble Now!
Buzz This
Vote on DZone
Share on Facebook
Bookmark this on Delicious
Kick It on DotNetKicks.com
Shout it
Share on LinkedIn
Bookmark this on Technorati
Post on Twitter
Google Buzz (aka. Google Reader)

Leave a Reply

Your email address will not be published. Required fields are marked *