“Adé khabar apé, Jum ? Serius amat lu melatonin internet ?“ tanyé Mat Kelor nyang lagi santai ngedeprok di atas sofa.
“Dari mané lu tauk si Jum lagi baca Koran di internet, Mat ? Jangan-jangan dié lagi asyik indehoy di dunié mayé amé bekas pacarnyé waktu di sekolah. Kan lagi musim tuh CLBK lewat fesbuk, “ samber si Pepen sambil cetacean.
“CLBK itu apa sih mas ?“ tanyé si Qodir bingung sebab kagak ngerti maksudnyé si Pepen.
“Cilukbak, Dir !“ jawab si Pepen ngegodain si Qodir.
“Lu kiré si Qodir masih orok, pake maenan cilukbak !“ katé Mat Kelor sambil cekikikan. “Maksudnyé cinté lamé bersemi kembali, Dir. “
“Katényé banyak pengusahé kecil nyang resah garé-garé warteg mau dipajekin, ” katé Jumadi abis bacé berité soal warteg di ibukoté.
“Orang Jakarta itu aneh-aneh ya. Warung makan kok dibilang warteg. Padahal di Tegal sendiri tidak ada warteg, ” protes si Qodir. “Mentang-mentang, yang jualan kebanyakan orang dari Tegal. “
“Bener, Dir. Mustinyé nyang dibilang warteg itu restoran-restoran di mall. Makanannyé kalah enak amé di warung, eh tega-teganyé kité disuruh bayar mahal. Mangkényé warteg, warung tega !” katé Mat Kelor sambil ngakak.
“Pemerintah provinsi DKI mau ngegenjot Pendapetan Asli Daerah, mangkényé warteg bakalan dipajekin, ” katé si Jum nerangin apé nyang barusan dié bacé.
“Kalo mau ngegenjot, kenapé dulu becak diapus ?” tanyé si Pepen asal ngablak, nyebelin nyang ngedengernyé.
“Lu kiré becak, digenjot ?” samber Jumadi. “Kalo mau naekkin PAD, jangan orang kecil nyang diperesin. Sono minta amé si Gayus nyang duitnyé milyaran. “
“Benar, mas. Pengusaha itu sudah banyak dipajaki. Dari pengurus RT/RW, kelurahan semua minta bagian. Belum lagi preman-preman yang minta uang keamanan. Padahal mereka sendiri yang membuat tidak aman, ” tambah si Qodir.
“Kité udé kebanyakan becandé. Sekarang nyang serius dikit. Kalo pajek itu kewajiban semué wargé negaré. Semué nyang kerjé atawa punyé usahé wajib ngelaporin pendapetannyé. Kan adé aturannyé, nyang penghasilannyé di bawah 60 juté per taon, kagak usah bayar. Kalo punyé atu doang, kali dapetnyé kagak sampek segitu. Tapi kalo adé nyang punyé 3 atawa 4, gimané ? Enak dong, dapetnyé banyak tapi kagak bayar pajek, ” katé Mat Kelor nyang kagak biasényé serius.
“Bener jugé, Mat. Pegimané kalo adé konglomerat nyang jualan franchise warteg, dari Sabang, Merauke ampek Singapura terus ke LA ? ” katé si Jum nyang ngedadak mikir kenapé repot-repot jadi kacungnyé bule di negaré orang. Mendingan pulang kampung ajé buka warteg.
“Tapi bisé rawan penipuan amé pemeresan, Mat, ” protes si Pepen. ” Pegimané tauknyé warteg mané nyang dapet 60 juté apé kurang ? Boro-boro adé catetannyé, duitnyé ajé disimpen dibalik kutang !”
“Nyang musti diberesin yé sistimnyé dulu. Pengusahé kelas kakap padé banyak nyang punyé jurus biar jangan banyak-banyak bayar pajek. Masa perusahaan besar pendapetannyé bisé diitung di bawah warteg ? Nah sebelon warteg dipajekin, musti diberesin dulu tuh pajek-pajek nyang diwarteg-in !” katé Mat Kelor sambil ketawa kebahak-bahak.
Related Posts
