“Pegimané, Mat ? Elu udé mantep belon mau ngambil ponsel apaan ?” tanyé si Pepen ke Mat Kelor nyang keliatannyé masih megangin blackberry storm-nyé
nyang ampir almarhum. “Romannyé tuh ponsel udé sekarat banget, tinggal nunggu waktunyé.”
“Benernyé gue sih butuh kagak butuh. Yah palingan bakal darurat ajé kalo nyetir mobil. Siapé tauk kalo adé apé-apé, repot kalo kagak punyé ponsel, ” jawab Mat Kelor nyantai.
“Ponsel itu sekarang bukan cumé kebutuhan ajé, Mat. Tapi gayé idup. Ponsel apé nyang elu punyé nentuin siapé elu, ” katé si pepen sok tauk.
“Kurang lebih samé amé mobil dong, Pen, ” celetuk Jumadi, “mobil lu nentuin siapé elu. “
“Benar, mas, Kalau mobilnya hasil utangan, biar mobil mewah juga menentukan kalau pemiliknya rajin ngutang, ” tambah si Qodir sambil cekikikan.
“Sekarang orang perlu ponsel bukan buat telepon ajé. Tapi untuk jaringan sosial. Ponsel itu ngubungin orang dari pelosok dunié. Jarak kagak lagi misahin kité amé orang-orang nyang kité kenal, ” celoteh si Pepen. “Ponsel kan bukan cuman bisé dipakek buat nelepon. Tapi bisa buat kirim-kiriman teks, nyari inpormasi lewat internet, bisé jadi GPS buat nyari jalan, komunikasi amé tuker-tukeran infpormasi lewat fesbuk, nonton klip di youtube atawa dengerin musik.”
“Iyé, Pen. Tapi akhirnyé waktu kité abis melototin layarnyé ponsel ajé, ” katé Jumadi. “Lagian layarnyé cumé seupil. Mangkényé banyak nyang matényé cepet rabun.”
“Itu dié, Jum. Lemak padé numbuh dimané-mané, abisnyé badan jadi jarang begerak. Ngejogrog ajé tiap ari kerjaannyé maenan ponsel, ” tambah Mat Kelor sambil cengar-cengir.
“Tapi kalo elu make ponsel kuno nyang cumé bisé buat nelepon doang, bakal diketawain lu amé orang-orang. Kagak sekalian make nyang tebel model batu bata, ” ledek si Pepen.
“Biarin ajé diketawain. Emangnyé tagihan bulanan kité mau dibantuin amé nyang ngetawain. Kalo di negeri kité sih bulanan buat make internet murah, di sini kan ajé gilé mahalnyé. Elu kaliin sebulannyé amé kontrak 2 taon alias 24 bulan. Jadi gede tuh duit, ” katé Mat Kelor. “Kité nyang tambah miskin tapi Steve Jobs nyang punyé Apple amé konco-konconyé nyang padé punyé pabrik ponsel mingkinan makmur !”
“Teknologi jaman sekarang entu emang nyang dituju orang nyang menengé kebawé. Nyang super kayé sih boro-boro padé nenteng iPhone , blackberry atawa iPad. Sementaré kité buang-buang waktu sambil ngabisin duit maenan ponsel nyang canggih. dié padé bikin duit milyardan dollar makek ponsel kunonyé nyang udé dipakek taonan, ” katé Jumadi enteng.
“Mangkényé nyang kayé tambah kayé. Duitnyé banyak tapi idupnyé irit. Kalo kité, duit cekak tapi maunyé belanjé ajé, ” tambah Mat Kelor sambil cekakakan.
“Yah, tapi jadi orang jangan ketinggalan jaman dong. Kité musti ikutin kemajuan. Kalo kagak balik ajé ke jaman batu, ” katé si Pepen kagak mau kalah.
“Kemajuan teknologi emang luar biasé, Pen. Dulu ponsel bikin sebel orang, sebab banyak orang kagak tau diri ngobrol seenaknyé kenceng-kenceng di tempat umum. Sekarang kité bukan cumé sebel dengerin orang ngobrol pake ponsel, tapi dengerin nyang maen video game di ponsel, nyang ngakak ngebacain status orang di fesbuk, belon lagi nyang ngomel-ngomel nerima teks abis diputusin pacarnyé, ” katé Mat Kelor sambil cekikikan.
“Itu belon seberapé, Mat. Bentar lagi keluar ponsel nyang bisé karaoke, ” katé Jumadi sambil mesem-mesem.
“Wah kalo beneran adé ponsel karaoke, mendingan gue nyetir mobil ajé deh kemané-mané biarin harga bensin mahal. Bayangin ajé kalo kité naek bis umum atawa kereta api, di sebelahnyé adé nyang nyanyi karaoke pakek ponselnyé. Jarak San Bernardino ke Los Angeles serasé ke New York ajé, kagak sampek-sampek rasényé !” katé Mat Kelor sambil ketawa kebahak-bahak.
Related Posts
