Dibo’ongin Pelem

Mat Kelor lagi suntuk. Entar malem Minggu mau ke mané ? Bolak-balik ke mall mulu, bosen jugé. Nyang diliat banyak, nyang dibeli kagak adé. Kalo orang laen ke mall, keliling-keliling bawa tas plastik isi belanjaan, ini sih pergi pulang tangan kosong. Apalagi kalo ngeliat nyang laen enak banget, ke mall di sebelahnyé adé nyang digandeng. Kalo pergi sendirian salah. Bedua amé si Pepen apé si Qodir enti dikirain pasangan sesamé jenis. Wah, repot urusannyé.

“Mat, gue liat dari tadi elu bengang-bengong ajé, kayak monyet di kebon binatang lagi nungguin dilemparin kacang amé pengunjung, ” tanyé si Pepen sambil ngegodain Mat Kelor.

“Gue nunggu dilemparin duit, Pen. Apé dayé punyé temen kantongnyé cekak semuényé, ” bales Mat Kelor. “Elu adé acaré apé ntar malem ?”

“Gue jugé lagi bingung nih, Mat. Mau ngajakin si Lolita makan, ngibing ke klub amé si Rosalita, apé ikutan ke party amé si Dolores, ” katé si Pepen gayé.

“Lho setahu saya ke semua tempat itu tidak boleh bawa hewan piaraan, mas. Sini titip ke aku saja chihuahuanya, ” celetuk si Qodir, polos.

“Nah, kené batunyé lu, Pen, ” katé Mat Kelor sambil ngakak. “Maksudnyé mau ngebanggain punyé temen cewek banyak, kagak taunyé disangkain cewek nyang bisé gonggong !”

“Gue jugé lagi kagak adé acaré nih entar malem. Gimané kalo kité nonton pelem ajé di bioskop Krikorian, Redlands ?” tanyé si Jum buat ngademin suasané. Ledek-ledekan mulu, ntar buntut-buntutnyé adé nyang ngambek, berabé.

“Lho memang sejak kapan bioskop di Amerika putar filem India, mas ?” tanyé si Qodir polos, mentang-mentang Jumadi senengnyé nyewa DVD pelem Indihé.

“Yaelah, Dir. Bayar tiket mahal-mahal masa nonton pelem Indihé ? Jauh-jauh lu ngerantau ke Amrik, nonton pelem Hollywood kek !” protes si Pepen.

“Wah filem Hollywood banyak bohongnya, males aku, ” katé si Qodir, bales protes.

“Nyang naményé pelem yé bo’ong semué, Dir. Kalo lu mau ngeliat nyang nyaté, Pelototin ajé tuh si Jumadi. Orangnyé lurus, kagak pernah ngibul model kité-kité, ” katé Mar Kelor sambil terkekeh-kekeh.

“Ya tapi filem Hollywood bohongnya suka kelewatan, mas. Contohnya saja filem horror. Kalau di Indonesia paling hantunya cuma nakut-nakuti atau paling banter nyekek saja. Kalau Hollywood, ada yang suka minum darah lah, beragoti daging-daging korbannya. Wah, repot !” katé si Qodir sambil bergidik, setengé serem, setengé jijay.

“Kalo gue sih dari dulu, dari masih kecil ampek sekarang paporitnyé tetep samé, Dir. Kagak berobé-robé, ” katé Jumadi.

“Iyé tauk, Jum. Pelem Indihé ! Tapi ngomong-ngomong kenapé sih elo ngefans banget ?” tanyé si Pepen.

“Simpel ajé, Pen. Masa kité udé keluar duit cuma buat dibo’ongin ajé ? Atawa ditakut-takutin, dibikin sedih ? Kalo pelem Indihé, kan seneng terus, nyanyi terus, dansa-dansi terus. Lagi seneng nyanyi, lagi susah juga nyanyi. Keluar duit kagak apé-apé asal kité dihibur. Apalagi idup udé banyak masalahnyé, ” katé si Jum kalem.

“Lha itu kan sama saja dibohongi juga, mas. Kenyataan di filem sama di dunia nyata kan beda besar. Di filem India, bisa kejar-kejaran di pantai. Di dunia nyata, boro-boro. Wong kalau musim panas, jalan saja susah, apalagi kejar-kejaran, ” katé si Qodir sambil cekikikan. Bisé jugé nih anak ngegodain orang.

“Gue tuh dari dulu waktu masih kecil ampek sekarang paling suka pelem kungfu. Jagoannyé bisé enteng ajé loncat ke ujung pohon cemara. Kalo ditembak, pelurunyé bisé enak ajé ditangkepin amé jari. Belon lagi nyang paling jago bisa narik kapal laut pake benang amé jarum jait ajé. Kalo udé keluar duit, jangan mau dibo’ongin kecil-kecilan. Sekalian cari nyang bo’ongnyé kagak tanggung-tanggung ! ” katé Mat Kelor sambil ketawa kebahak-bahak.(IM)