Chuck and Pepen

Bang Madi/Indonesia Media

Sementara kit é tinggalin dulu Mat Kelor nyang lagi nemuin sodaré-sodarényé di kampung. Nyok kité balik lagi ke Kalifornia ngikutin ceritanyé sohib-sohib Mat Kelor di sané.

"Salam Lekom, " kedengeran suar é tamu sambil ngebel pintu apartemen.

"Lekom Salam, " sahut Pepen sambil ngebukain pintu, "Eh bang Madjid. Adé angin apé nih, udah lama kagak nongol. Ayo masuk !"

"Nyang pasti bukan angin puting beliung nyang kemaren entu ngebalikkin 9 gerbong kereta amé satu traktor-trailer di Moreno Valley, " katé bang Madjid sambil cengengesan. "Ngomong-ngomong kapan Mat Kelor balik ke sini lagi ?"

"Kagak tahu deh bang. Rencananyé sih cuman bentaran doang. Tapi kagak tahu kalo di sono dikawinin babényé amé anak orang, " jawab si Pepen seenak udelnyé sendiri.

"Udah pasti, kalo dikawinin yah amé anak orang dong, Pen. Emangnyé bisa amé anak jin ? " bales bang Madjid sambil cekakakan. "Ngomong-ngomong elu sendiri kapan mau pulang nengokin enyak lu nyang udeh jadi jandé ?"

"Pengennyé sih gitu bang, tapi surat-surat gue kan belon beres. Pegimané bisa pulang ?" katé si Pepen nyang diem-diem emang udah kangen juga amé enyak dan empok-empoknyé.

"Lho, kok ada tamu. Piye, apik kabare, mas ?" selak si Qodir nyang baru keluar dari kamar.

"Emas sih bagus terus kabarnyé, Dir. Harganyé ajé naek terus kayak bengsin. Sayang gue kagak pernah nyelengin emas. Kalo iyé pasti sekarang gue udeh beduit, " saut bang Madjid polos.

"Ya ampun bang Madjid, mas itu panggilan orang Jawa ke orang nyang tua-an. Bukannyé emas perhiasan, " katé Pepen sambil terkekeh-kekeh.

"Nah kebetulan adé elu bedua di sini. Gue mau tanyé apé elu pengen cepet beres urusan surat-surat keimigrasian elu biar bisa pulang nengokin keluarga di kampung ?" katé bang Madjid serius.

"Kepingin sih kepingin, mas. Tapi berdasarkan pengalaman, banyak yang nawarkan begitu, buntut-buntutnya lembaran hijau habis tapi kartu ijonya ndak keluar-keluar, " kata Qodir ati-ati.

"Mangkényé lu tuh kudu baca koran amé nonton warta berita, jadi kagak ketinggalan jaman !" katé bang Madjid kalem, "kan baru ajé keluar peraturan baru di Kalifornia. Lu udah nonton pilemnyé Adam Sandler; Chuck and Larry, kan ? Nah, elu sementara tinggal bareng amé bos gue, bule nyang masih bujangan, entar lu pura-pura nikah amé dié. Kan di Kalifornia mulai bulan ini pasangan sesama jenis boleh menikah. Asal kalo udah dapet ijo-nyé, lu inget-inget gue dong. "

"Hidup mati bakal aku ingat terus, mas. Nanti kuburannya mas pun bakal sering kutaburi kembang, " katé si Qodir serius. "Tapi gimana kalau mas Pepen duluan. Nanti kalau sudah sukses, baru aku nyusul. "

"Dir, maksudnyé inget-inget tuh, adé salam tempelnyé ! Kalo lu kagak berani biar gue nyang duluan. Kapan bang, kité bisa temuin si bule ?" tanyé Pepen kagak sabaran. Pikirnyé ini kesempatan emas, kan lebih gampang kawin boongan dengan sesamé lelaki, dibanding dengan lawan jenis.

Singkat cerité, hari entu juga Pepen pergi dianterin bang Madjid ke rumah si bos. Kagak berapé lama si Pepen pulang dan langsung disongsong amé si Qodir. "Lho mas kok lesu amat kelihatannya ?"

"Kurang asem si Madjid. Komisi ajé nyang dipikirin. Tuh bule bukannyé mau kawin boongan supayé gue dapet ijo, tapi mau nyari jodoh sesamé jenis bakal beneran ditikahin. Si Madjid nyang dapet duit, bokong gue nyang sakit ! Amit-amit jabang dedemit ! " omel si Pepen dengan muké sewot, bikin si Qodir meledak ketawa kagak berenti-berenti.