Pulang Kampung (1)

Bang Madi / Indonesia Media

Beberap é pembacé nyang setié ngikutin cerité Mat Kelor padé nanyain kok si Mat kagak pernah nongol lagi ? Apé udah digepak amé imigrasi ? Si Mat lagi cuti pulang kampung, tapi jangan kuatir nantinyé bakalan balik lagi. Lha kok bisa, pegimané caranyé ? Bisa dong, si Mat kan pinter megang duit. Kagak gampangan ngambil kredit ini-itu, kayak orang kité padé umumnyé. Mobilnyé ajé masih Honda Accord taon 90-an nyang lampu depannyé bisa melek-merem kayak anak kecil lagi cacingan. Soal surat-suratnyé gimané dong ? Ah mau tau ajé, tunggu ajé tanggal maennyé. Sekarang nyok kité ikutin ajé jalan ceritanyé.

"Alhamdulillah, akhirnyé nyampek juga di tanah aer, " katé Mat Kelor lega waktu pesawat Singapore Airlines mendarat di bandara Soekarno-Hatta.

"Sayangnyé kité musti pake pesawat asing. Abisnyé Garuda kagak boleh terbang ke Amerika lagi, " katé penumpang di sebelah Mat Kelor.

"Boleh ajé sih, bang, " katé Mat Kelor sambil mesem-mesem. "Cuma nyang punya Garuda kagak ngasih. Takutnyé kru-nyé sekalian amé pesawatnye kagak mau pulang, betah di sono kayak kité-kité. "

Singkat cerité Mat Kelor nyampe ke bagian imigrasi. "Saudara di luar negeri kerja atau sekolah ?" tanyé petugas imigrasi sambil ngebolak-balik paspor Mat Kelor.

"Saya sih kagak adé sodara di Amerika, pak. Cuma sendirian ajé di sono. Justru sayé pulang mau nemuin sodaré-sodaré, " katé Mat Kelor nyang keluar lagi isengnyé.

"Maksud saya bukan saudara anda, tetapi anda itu sekolah apa kerja di luar negeri ? " tanya si bapak petugas lagi setengah melotot.

"Saya kerja pak, emangnyé siapé nyang sanggup biayain sayé sekolah ? Tapi sayé kerjanyé di dalem negeri, pak. Kalifornia kan masih masuk dalem negeri. Kalo luar negeri itu, Meksiko pak, " katé Mat Kelor dengan wajah tanpé dosé.

"Enak dong dollarnya banyak, " katé si bapak petugas dengean sebel sambil ngelemparin paspor Mat Kelor nyang udah dicap tanda kedatangan.

"Banyak juga karena kerjanyé berat ngangkut-ngangkut gentong ratusan kilo. Dié sih cuma stempel nyang diangkat-angkat, " gerutu Mat Kelor sambil berlalu.

Setelah ngambil koper-kopernyé, Mat Kelor segera menuju ke bagian bea cukai nyang kerjaannyé mereksain barang bawaan orang.

"Barangnya banyak sekali ini. Ayo buka kopernya biar saya periksa, " katé ibu petugas.

Mat Kelor ngambil anak konci dari kantongnyé dan ngebukain koper-kopernyé tanpé banyak bicaré.

"Ini oleh-olehnya banyak sekali. Mbok saya dibagi, " katé ibu petugas sambil ngaduk-ngaduk isi koper Mat Kelor. Padahal ngaturnyé ajé setengah mati ampek perlu dibantuin amé Si Qodir, Jumadi dan Pepen. Eh si ibu enak ajé ngeberantakin.

"Oleh-oleh banyak juga bakal dibagi-bagiin, bu ! Maklum sodaré sayé banyak. Masak pulang kampung kagak bawa apé-apé ? Kalau si ibu mau oelh-oleh boleh ajé asal mau jadi sodaré sayé, " jawab Mat Kelor sambil mancing.

"Ya saya mau saja jadi saudara anda, asal dibagi oleh-olehnya, " katé si ibu nyang ngirain bakal dapet sesuatu.

"Bener nih bu mau jadi sodaré sayé ? Kebetulan kong Ma'ing, adek nenek sayé nyang mukanyé bopengan lagi nyari bini kedua !" katé Mat Kelor iseng.

Si ibu dengan sebel nyuruh Mat Kelor pergi. "Selamet deh barang gue, " katé Mat Kelor dalem ati.

Sampek di luar, Mat Kelor disambut amé nyang jemput : enyak, babe, mpoknyé amé abang iparnyé, ponakan-ponakan, kong Ali, Haji Umar pengurus mesjid, kagak ketinggalan si Sarip, Sanip, Ical amé temen-temen maen Mat Kelor laennyé. Di belakangnyé masih ada babah Liong nyang punya toko kelontong di ujung pasar, mpok Jubaedah bininye Jumadi, mpok Jemé nyang jualan gado-gado di ujung gang, enyak amé mpok-mpoknyé si Pepen, bang Inong tukang tambel ban sepeda, amé banyak lagi nyang Mat Kelor udah lupa-lupa inget. Busyet deh bandara penuh, nyang dateng satu orang, nyang jemput 2 metro mini !