Buta Mata Ap é Buta Hati ?
Mat Kelor/Indonesia Media
 "Hebat ya di Amerika ini, orang buta lha kok ya bisa jadi gubernur. Bukan di negara bagian yang kecil-kecil, tetapi malahan di New York !" seru si Qodir dengan takjub waktu baca berita di koran mengenai David Peterson, orang keturunan Afrika Amerika yang buta sejak umur 3 bulan, ngegantiin Eliot Spitzer nyang ngundurin dari dari jabatan gubernur gara-gara ketahuan suka jajan. Bukan jajan bakso, tapi jajan cewek panggilan.
"Indonesia lebih hebat, bukan cuma gubernur tapi pernah punya presiden nyang buta, " katé si Pepen sambil cengengesan.
"Iya, tapi abis kagak berapé lama lantas dicopot. Mau nyalonin diri di pemilihan berikut malah dijegal amé KPU. Katényé kagak menuhin syarat kesehatan calon presiden, " katé Jumadi dengan sebel, "Denger-denger buat pemilu tahun depan Gus Dur bakalan dijegal lagi. "
"Emangnyé maen sepak bola, pake jegal-jegalan ?" goda si Pepen sambil cekakakan. "Adé nyang bilang udah deh Gus udah ketuaan, biarin kasih nyang mudaan mimpin bangsé. "
"Mané lebih tua amé John Mc Cain, calon presidennyé partai republik ? Nah Ronald Reagan waktu jadi presiden ajé juga udéh uzur ! Bukan cuma tua-tua keladi, makin tua makin jadi. Tapi tua-tua kelapa, makin tua makin besanten !" bales Jumadi sambil terkekeh-kekeh. "Masalah umur kan tergantung orangnyé. Bisé jadi nyang mudaan nyang lebih bisa, tapi bisé juga nyang tua nyang lebih manteb !"
"Beda dong orang tua di sini amé di sono. Di sini pitamin ame makanannyé bagus, jadi biar udah tua masih padé seger. Di sono orang cepet padé loyo, batuuuk terus, " katé Pepen kagak mau kalah.
"Ada yang bilang sebaiknya Gus Dur itu jadi guru bangsa saja, " celetuk si Qodir.
"Terang ajé padé ngusulin begitu. Soalnyé di Indonesia guru mané pernah didengerin amé muridnyé ? Biar katé udeh bekoar-koar ampek ludah muncrat kemané-mané, nyang naményé murid sih cuek-cuek ajé, " katé Jumadi dengan nadé agak tinggi. Soalnyé di keluarganyé si Jum banyak nyang nasibnyé kagak jauh amé guru Oemar Bakri, lagunyé Iwan Fals.
"Tapi kité musti mikir nyang logis dong Jum, kenapé sih kagak milih nyang lebih sehat ajé ?" katé si Pepen mulain agak serius.
"Mané nyang lebih penting, sehat jasmani apé sehat rohani ? Elu sendiri pilih nyang mané bakal jadi bini lu, cewek nyang cakep, sehat tapi gila, apé nyang cakep, soleh tapi jalannyé pincang ?" tanyé Jumadi.
"Yah kalo bisa gue maunyé nyang bahenol, soleh, tapi larinyé kenceng dong Jum. Masak pincang sih, tega amat elu ?" jawab Pepen sambil mesem-mesem.
"Masalahnyé cewek nyang sempurna kayak gitu kagak adé nyang mau amé elu, Pen !" katé Jumadi ngegangguin si Pepen.
"Yah larinya kencang, cepat ninggalin mas Pepen ke pelukan lelaki lain, " samber si Qodir sambil terpingkal-pingkal. Bisa ajé nih anak.
"Nah itulah Pen, semua orang kan adé kelebihan adé kekurangannyé. Gus memang kagak bisa ngeliat dengan matényé, tapi beliau bisa ngeliat dengan maté hatinyé. Sementaré kité nyang melek, hatinyé malahan buta ! " katé Jumadi kalem. "Liat ajé tuh pejabat-pejabat negaré kité, matényé melek kalo ngeliat duit, tapi buta untuk ngeliat penderitaan rakyat !"
"Lebih baik kita dituntun orang buta ke mata air, daripada dituntun orang melek ke jurang !" tambah si Qodir nyang udah mulain ngerti jalan pikiran Jumadi.
"Bener juga ! Mendingan orang bisu nyang jadi juru pidato, daripadé mereka nyang bekoar-koar nebarin kebencian !" katé Pepen sambil mencerna omongan si Jum. "Gue jadi bersyukur, biar tampang dan nasib gue pas-pasan, tapi gue masih punya hati nurani !"
"Kalo soal nasib, gue kagak bisa nulungin. Tapi kalo soal tampang pas-pasan, sini gue anterin elu ke salon, biar dipermak dikit supayé adé perbaikan !" katé Jumadi sambil ketawa terbahak-bahak.
| 
