Urusan Pajek
Bang Madi
/ Indonesia Media
 Si Qodir lagi kebingungan ngeliatin Jumadi, dari tadi asyik amat di meja makan. Bukanny é asyik makan, tetapi nulis-nulis amé ngitung-ngitung, sementaré di atas meja penuh amé bermacem-macem kertas. Mau nanya, entar salah-salah malah dibentak, dianggep ngegangguin orang nyang lagi sibuk.
Akhirnyé si Qodir dapet akal, pura-pura mau ngebantuin. "Kelihatannya sibuk sekali mas Jum. Apa barangkali ada yang bisa saya bantu ?"
"Ah kagak jugé, Dir. Gue 'ma kasih banget elu mau ngebantuin. Tapi gue bisa kerjain sendiri kok, " katé Jumadi sambil matanyé tetep lengket ke kalkulator.
Sambil ngobrol, kesempatan buat si Qodir ngelirik ke tumpukan kertas-kertas di atas meja nyang udeh dikaret-karetin amé si Jum. Sepintas keliatan adé bon-bon bensin, bon-bon obat dan dokter, sampek adé jugé tandé terimé sumbangan-sumbangan dari macem-macem organisasi. "Rupanya kerjaan di kantornya mas Jum ini banyak sekali ya, sampai harus dikerjakan di rumah, " pancing si Qodir nyang kepengen banget tahu sebenernyé Jumadi lagi ngapain sih.
"Bukan, Dir. Gue mané pernah selamé di Amrik kerja kantoran ? " katé Jumadi sambil bebalik ngadepin si Qodir, "gue ini lagi ngurusin pajek penghasilan taonan. Mendingan gue kerjain sekarang daripadé entar keburu-buru, kalo udah deket harinyé. "
"Lho urusan pajak kok sampai segitu repotnya, mas Jum. Kalau aku setiap tahun cuma melampiri formulir pajak yang dapat dari tempat kerja, " katé si Qodir yang sekarang malah tambah bingung jadinyé.
"Adé dua caré, Dir. Nyang model elu tuh perhitungannyé cuma garis besarnyé ajé nyang diitung. Berapé penghasilan elu totalnyé dan berapé sebenernyé pajek nyang elu harus bayar. Kalo jumlah total pajek nyang dipotong dari gaji elu ternyaté lebih kecil dari jumlah nyang seharusnyé elu mustri bayar, yah selisihnyé elu musti bayar ke pemerentah. Kalo nyang elu udah bayar ternyaté kegedean, selisihnyé dipulangin ke elu, " katé Jumadi nyang kalo nerangin pasti sedetil-detilnyé. Mangkényé si Jum si kagak bakalan pernah diangkat jadi general manager, soalnyé di perusahaan mané adé jabatan detail manager ?
"Nah kalau caranya mas Jum bagaimana ?" tanyé si Qodir nyang masih penarasaran.
"Kalo gue pake caré itemized. Artinyé diitung terperinci. Penghasilan gue berapé totalnyé, dikurangin pengeluaran-pengeluaran gue. Nah, berdasarkan semua data entu nanti adé pertimbangan, apé sebenernyé pajak nyang gue udeh bayar ketinggian apé kerendahan, " katé Jumadi lagi.
"Lho itu kok sumbangan-sumbangan bisa dihitung juga, mas Jum ?" tanyé Qodir sambil nunjuk bundelan tandé terimé di ujung meja.
"Sumbangan, donasi, zakat, fitrah, itu kan termasuk pengeluaran jugé. Jadi tetap bisa diitung di laporan pajek dong, " jawab Jumadi.
"Ah gue pernah minta tanda terimé buat buat urusan pajek, eh malah gue diomelin. Katényé kalo mau ngasih sumbangan musti ikhlas, jangan ngarepin duit kembali, " celetuk Pepen nyang baru keluar dari kamar mandi.
"Emangnyé kalo lu nyumbang serebu terus bakalan dapet ganti dari pemerentah serebu ! Bukan gitu ngitungnyé. Duit nyang elu pake buat nyumbang itu termasuk pengeluaran, jadi bisa ngurangin pajek elu. Mungkin tuh orang belagak pinter ajé tapi sebenernyé kagak ngerti aturan maen di Amerika. Berdasarkan hukum di sini legal kok, sumbangan itu diperhitungkan amé pajek kité, " katé Jumadi nyang ternyaté banyak ngerti peraturan di sini. "Atau kemungkinan kedua, organisasi itu gelap, kagak kedaptar di Amerika sebagai organisasi nir laba, bahasé sininyé non profit organisation. Kalo gitu mané bisé sih ngasih tandé terimé ?"
"Tapi katényé nyang paling gede potongan pajek kalo punyé tanggungan ?" tanyé Pepen lagi, " Maké itu banyak orang kité padé ngaku punyé tanggungan, nomor SS anak-bini orang dimasukin ajé di laporan pajeknyé. "
"Ah itu sih dosé. Gue sih takut masuk neraké nipu-nipu begitu, " katé Jumadi kalem. "Lagian kalo gue nipu pake nama amé nomor SS orang laen, nanti suatu saat Insya Allah gue bisa jadi citizen sini, pas gue mau sponsorin si mpok, bakal ditanyé amé pemerentah sini, lho di sini terdaptarnyé punyé istri nyang namanyé Lolita Rosalita, kok sekarang mau nyeponsorin bini lagi nyang namanyé Siti Jubaedah ?"
"Bilang ajé kalo waktu muda elu celamitan; tukang kawin !" celetuk Pepen sambil ketawa kebahak-bahak.
| 
