Obama
Bang Madi /Indonesia Media
 Si Qodir lagi asyik berselancar di dunia maya. Rupany é dié lagi ketarik amé berité-berité terkini soal Obama, salah satu calon presiden dari partai Demokrat nyang kalo betulan menang, bakalan jadi presiden Amerika pertama nyang berkulit berwarna.
"Dukungan ke Obama semakin banyak. Sekarang suara yang dipegangnya sudah di atas Hilary Clinton, " kat é si Qodir sambil baca artikel di internet.
"Hebat jugé yeh ? Siapé nyana, Obama nyang tadinyé udah ketinggalan, bisa mendadak nyusul ?" katé Jumadi nyang mulain ketarik amé omongannyé si Qodir.
"Obama entu ibaratnyé mesin diesel. Lama angetnyé. Tapi kalo mesin udéh panas, larinyé kenceng, " celetuk Pepen sambil mesem-mesem.
"Bukan cuma entu, Pen. Obama kan adé didikan Betawinyé biar cuman bentaran dié sekolah di sono. Mangkényé dié punyé ilmu ngeles. Biar gimané jagonyé Hilarry amé komplotannyém tetep ajé Obama bisa berkelit, " tambah Mat Kelor.
"Sayangnya beliau ndak pernah belajar di kampungku. Pasti bakalan lebih hebat lagi, " katé si Qodir.
"Lha emangnyé apé kelebihan ilmu dari kampung lu ?" tanyé si Jum, Pepen amé Mat Kelor bebarengan.
"Ilmu santet ! Lawan-lawannya disantet, biar waktu kampanye pada tidak bisa bicara. Yang tidak mau milih dia, jadi salah coblos, " katé si Qodir enteng.
"Itu sih model pemilihan di negeri kité, Dir. Di sini sih kagak pake gitu-gituan, " katé Mat Kelor sambil terkekeh-kekeh. "Kalo di sini biaya kampanye gede buat masang iklan di mané-mané. Tapi kalo di sono, kampanye musti keluar duit gede, buat bayarin dukun masang jin di mané-mané !"
"Rasanya Obama itu calon jadi lho, mas. Dukungannya banyak dari mana-mana. Dari Jepang saja ada seluruh kota yang mendukung dia. Kebetulan nama kota itu sama dengan namanya; Obama !" katé si Qodir nyang emang ngefans banget amé Obama.
"Belon lagi penduduk Betawi nyang jumlahnyé jutaan orang. Buat kité-kité kayaknyé lebih adem presiden nyang model Obama, daripadé koboi model si Bush, " katé Pepen kagak mau kalah.
"Masalahnyé Obama itu bakalan jadi presiden Amerika, bukan presiden Jepang atawa Indonesia, " samber Mat Kelor sambal ngakak, " jadi dukungan-dukungan dari luar negeri kagak adé gunanyé. "
"Tapi kan dukungan dari orang-orang seperti kita ini yang memang tinggal di Amerika ini, tentu ada gunanya, " katé si Qodir ngeyel.
"Masalahnya elu kan kagak boleh ikutan milih presiden Amerika, Dir. Boro-boro bisa ngejatuhin pilihan, Dir, tapi elu sih cuma dikasih 2 pilihan ajé, dipulangin apé sukarela !" celetuk Mat Kelor sambil terbahak-bahak.
"Mendingan elu jauh-jauh deh dari tempat pemilihan. Salah-salah working permit lu malah dicabut amé imigrasi !" tambah Pepen sambil ngakak.
| 
