Mau Buka Usah é
Bang Madi /Indonesia Media
 "Setelah kupikir-pikir, mosok di Amerika kerja sama orang terus. Nah aku mau wiraswasta buka warung es dawet. Mosok yang jual es boba bisa jadi kaya raya, tapi aku tidak ? " kata Qodir waktu lagi ngumpul am é temen-temennyé.
"Mané laku jualan es di udara dingin gini, Dir ?" celetuk Mat Kelor sambil cengar-cengir. "Nggak sekalian elu jualan es serut di Alaska !"
"Lha kan ada menu lain, wedang jahe ! Terserah pembeli, mau minuman dingin ada, minuman hangat ada, " jawab Qodir dengan gagah.
"Elu muja di mané bisa dapet elmu bikin es ? Asal jangan sampek pembeli tahu, lu cemplungin celana dalem ke dalem olahan es. Entar nasib lu kayak mi Gajah Mada yang pernah babak belur digosipin macem-macem, " katé si Pepen serius.
"Eh Pen, dawet itu artinyé cendol ! Bukannyé cawet !" saut Mat Kelor sambil terbahak-bahak. (cawet = celana dalam)
"Gue yakin mungkin dari segi modal elu udah punya. Soalnyé idup lu kan irit kagak kayak kité-kité. Tapi dari segi mental apé lu siap ? Gimané elu ngadepinnyé kalau langganan lu padé pindah belanjé ke tempat laen ? " tanyé Jumadi.
"Iyé Dir, gimané kalau adé orang Betawi nyang buka warung cendol di kompleks seberang ? Langganan lu bisa padé pindah tuh, " katé Mat Kelor. " Lu tahu kan kalo orang Jawa bikin apé-apé pakek santen kelapé, bule pakek keju, tapi Betawi punya spesial, pakek susu kambing !"
"Lha saudara-saudaraku kan banyak. Nanti aku interogasi satu-persatu apa pernah lihat langgananku si A dan si B beli es di tempat lain ? Kalau sudah yakin, aku datangi dan minta penegasan sebenarnya mau beli es di mana ? " kata Qodir dengan gagah kayak Raden Gatotkaca mau terbang ke langit.
"Kalo ternyaté dié bilang mendingan ke tempat laen, pegimané ?" tanyé Mat Kelor sambil senyum-senyum.
"Aku bikin pengumuman bahwa yang bersangkutan sudah menyatakan keluar dan pindah ke tempat lain. Dengan demikian segala tindak-tanduknya bukan menjadi tanggung jawab aku lagi !" katé si Qodir lagi dengan yakin.
"Eh Dir, apé hubungannyé belanjé es cendol amé tanggung jawab lu ?" katé Mat Kelor balik nanya sambil ngakak.
"Lha kalau langganan tidak puas minum es bikinanku, itu kan bukan salahku ! Itu kan salah langganan sendiri ! Kenapa kok lidahnya tidak bisa menikmati minuman yang uenak tenan !" katé si Qodir ngotot.
"Dir, lu mau usahé di sini jangan sipat Rahwana lu bawa-bawa ! Di sini musti siap ngadepin persaingan. Lihat ajé di seberang pom bensin pasti adé pom bensin laen !" katé Jumadi nasehatin. "Kalo elu mau bertindak, pikir dulu baek-baek, jangan nantinyé jadi bahan ketawaan orang. Nah nyang paling penting elu musti punya kaca. Tarok tuh di atas meja kerja lu !"
"Iyé jadi lu liat kalo adé jerawat langsung lu pencet. Mané langganan percaya kalo dagangan lu bersih, sedang muké lu ajé jerawatan !" tambah Pepen sok tau.
"Bukan gitu. Maksud gue biar elu selalu mawas diri dan tawakal. Kalo langganan lu padé pindah, lu ngaca, introspeksi ! Apé karena santen yang elu paké udah basi ? Apé gara-gara elu suka kebanyakan mulut, ngomongin orang mulu, jadi langganan lu padé sebel ? Maksud hati cuma mau minum cendol, eh malah kuping sakit ngedengerin nyang kagak-kagak. "
"Lu juga musti cegah jangan sampek karyawan lu kagak produktip. Sebab itu elu musti kasih kesempatan ke semua orang. Jangan nyang elu elus-elus cuma dié-dié ajé nyang elu percayé ? Malah nyang pinter-pinter elu bekep ajé, mau nongol dikit langsung lu jitak ! " tambah Pepen.
"Ngomong-ngomong lu lagi padé nyindirin siapé nih ? " tanyé Mat Kelor sambil senyum simpul.
"Nah itu jeleknyé orang kité. Kité nih lagi ngajarin nyang bener eh dibilangin macem-macem. Nyang baek kudu dicontoh sedang nyang jelek kité bébérin biar jangan sampek adé nyang nyungsep garé-garé ngulangin kesalahan nyang samé. Gitu carényé kalo mau maju, " katé Jumadi nyang orangnyé bijaksané kayak Judge Bao di RCTI.
"Wah terima kasih lho mas, pikiranku sekarang jadi terbuka. Nah ngomong-ngomong masing-masing mau kongsian berapa-berapa untuk memulai usaha ini ? Aku kan yang punya keahlian, nah mas-mas yang ngumpuli duitnya, " katé Qodir polos tanpé dosé.
"Ajé gilé lu Dir. Aer liur gue udéh nétés nih ngebayangin minum es cendol gratis. Kagak tahunyé belon apé-apé udéh dimintain duit duluan ! " katé si Pepen keki.
"Rupanyé mau buké usahé cuma modal niat doang nih orang. Emang Amerika punya bapak moyang lu ? " katé Jumadi sambil ketawa kecut.
| 
