Siraman
Bang Madi
/ Indonesia Media
 "Dir, gue denger elu sekarang jadi guru pencak " tany é si Pepen buka bicaré, waktu lagi ngumpul am é temen-temennyé seapartemen. "Nah elu amé kecoa ajé takut, gimané bisa ngajarin silat ?"
"Lho bukan gitu, tho, mas. Pak Muksin yang ngajar silat, sedang aku yangi memberikan siraman rohani, " jawab Qodir dengan yakin. "Perguruan silat kan bukan hanya perlu olah badani saja tetapi juga olah mental !"
"Biar kayak Raden Gatotkaca yé, Dir. Otot kawat, tulang baja, muké tembok !" samber Mat Kelor sambil cekakakan.
"Gue denger-denger emang gitu, Dir. Tapi elu abis bertapa di kuburan siapé, bisa dapet wangsit ? " tanyé Jumadi kebingungan.
"Lha aku ini kan orang terlatih, ndak main-main loh, pernah ikut penataran seminggu sekali, " katé si Qodir dengan bangga.
"Nyang bikin gue bingung elu kalo ngomong ajé suka sembarangan, bikin orang kesinggung melulu. Kok bisa ngasih ceramah ?" tanyé si Pepen nyang masih bingung.
"Buktinya aku yang dipercaya, malah bukan yang sudah punya S2 ! " jawab si Qodir mantab.
"Lu kalo kagak pengalaman, baek-baek salah siram, " celetuk Mat Kelor sambil ngakak. "Mustinyé lu bikin orang adem, eh malahan lu siram aer panas !"
"Gue denger lu bukannyé ceramah malah ngomongin bang Ji'un nyang lu bilang pindah ke perguruan Batu Karang, " katé Jumadi nyang intelnyé kesebar di mané-mané. Udah gitu pinter ngumpetnyé, kagak ketahuan siapé. Kagak kayak intel kité nyang di mané ajé beceng-nyé ditonjol-tonjolin, biar orang padé tau. Sebenernyé sih kagak perlu intel-intelan, orang kité kan mulutnyé suka jeplak sendiri kagak perlu ditanyain dulu. Budayé kité kan katényé tembok ajé bisa ngomong.
"Padahal ternyaté bang Ji'un pindahnyé ke perguruan Tempayan Emas. Gimané lu bisa ngaco gitu ?" tanyé Jumadi lagi.
"Kesalahan bukan pada pesawat televisi anda, tapi pada mata anda !" katé Qodir ngebanyol, niruin pengumuman teve kité nyang kadang-kadang mendadak ilang siarannyé. Rakyat kité emang disuruh sabar mulu amé pemerentah. Jalanan udah kayak kubangan kebo masih disuruh sabar sampek abis pemilu. Kalo di sini baru bolong dikit musti buru-buru dibenerin, jangan sampek jabatan jadi melayang.
"Yang penting kan bukan pindahnya ke mana. Tapi kepindahannya itu yang patut dipertanyakan, " tambah Qodir mantab, untung nggak sampek kayak pak Harmoko nyang waktu kampanye sampek buké baju segalé saking semangatnyé.
"Elu mah emang ngaco, dari jaman kuda gigit kondé, bang Ji'un naményé masuk di komputernyé perguruan Batu Karang. Di tempat elu kan cuma bantu-bantu ajé, karena dimintain tulung amé pak Muksin, " katé Jumadi nyang emang tahu bener jalan ceritanyé, nggak kayak si Qodir nyang asal mangap ajé mulutnyé.
"Sebelon adé bang Ji'un, nyang belajar silat di tempat lu boro-boro bisa maenin jurus. Masang kuda-kuda ajé kayak kuda kebelet kawin ! " samber Mat Kelor sambil cekikikan. "Abisnyé di rumah padé kagak pernah mau latihan silat. Waktunyé abis buat nyolek-nyolek bininyé mulu !"
"Ceramah tuh kayak silat, Dir. Kalo elu mau gapé, lu pake ilmu gajah. Tahu dong gajah kalo tereak gimané kencengnyé ? " katé Pepen.
"Lho maksudnya apa tho, mas ?" tanyé si Qodir nggak mudeng.
"Yah lu ngomong asal kenceng ajé sampek nyang ngedengerin sakit kupingnyé. " jawab Pepen sambil ngakak.
"Atawa pake ilmu uler. Muter-muter amé ngelingker terus kagak ketahuan nyang mané kepalé yang mané buntutnyé, sampek nyang ngedengerin bingung sendiri !" celetuk Mat Kelor sambil ketawa kebahak-bahak.
| 
