em - bi - é
Bang Madi/Indonesia Media
 Mak Kelor am é Jumadi maen ke tokonyé Oom Leo. Denger-denger si oom disatronin 3 orang badan gedé palé cepak, tapi nggak tahu juntrungannyé apé. Namanyé sesamé orang di rantau, langsung sontak musti disamperin. Kalo adé apé-apé masak temen-temen diem ajé ? Tapi ternyata Sabtu siang entu, tokonyé tutup dan adé catetan di depan, mohon maap hari ini bukanyé telat, adé urusan keluargé !
"Wah Jum, adé apé yé ? Jangan-jangan garé-garé disantronin orang, jadi padé berak-berak masuk ICU ?" tanyé Mat Kelor rada khawatir.
"Elu tuh suka mikir yang kagak-kagak, buntut-buntutnyé jadi gossip kemané-mané, " katé Jumadi nenangin sohibnyé, "Kité tungguin ajé bentaran, dan tanyé langsung amé yang bersangkutan. "
Kagak berapé lama adé mobil Toyota Sienna parkir di depan toko. Keliatan si oom loncat, dan mobilnyé langsung cabut. Segera kedua sohib ngedeketin.
"Lho, udah padé lama nungguin ? Padé mau belanjé bir ? " katé si oom ngegodain. Padahal kan tahu banget orang Betawi kagak minum bir, tapi senengnyé kopi pait. Apélagi kalo ditemenin amé singkong rebus.
"Kok tumben oom, bukanyé telat ? Semuanyé baek-baek ? " langsung ajé Mat Kelor nembak langsung. " Soalnyé kité jadi khawatir nih, denger-denger si oom disatronin orang ?"
"Ah, kagak adé apé-apé, " katé si oom sambil ketawa. " Itu cuma karyawannyé warung soto Betawi di Redlands, nanyain kok denger-denger gué amé si tante sekarang kalo makan soto ke Monterey Park, kagak kesitu lagi. "
"Lah, urusan soto ajé kok sampek segitu seriusnyé. Wajar ajé langganan pindah kalo makanan di tempat lain enakan. Sayé amé si Jum dulu bolak-balik ke Pho Hoa, tapi setelah adé mie Janty, biar jauh, yéh kité samperin. Amé Tuhan kité musti setia, amé laki atawa bini juga ! Tapi kalo nyang laennyé kan terserah kité mau pegi kemané ? " katé Mat Kelor nyap-nyap sambil ngebayangin nikmatnyé makan mi ayam. Maklum di kampung dulu biasanyé makan bakso abang-abang nyang kuah saosnyé warnanyé kayak emak-emak lagi dateng bulan.
"Elu kalo mau makan mie terus terang ajé, Mat. Bentar lagi kalo si tante dateng, gue bilangin supaya masak mie, " katé si Oom sambil senyum-senyum. "Ngomong-ngomong gue tadi telat, gara-gara ngadirin anak kedua yang tamat sekolahnyé dan dapet gelar MBA."
"Seneng dong oom ? Punya anak baek, sekolahnyé pinter, kerjanyé sukses, gajinyé gedé ! Sayang si Jum kagak punya anak perempuan, kalo nggak udah buru-buru ngajakin besanan, " katé Mat Kelor ngegodain sohibnyé sambil ketawa.
"Semuanyé anugerah Tuhan, Mat. Jangan kité jadi gedé kepala " katé si oom. "Kité generasi peratama nyang ngerantau ke Amerika susah dah dapet pendidikan setinggi itu. Tapi generasi berikutnyé, anak-anak, cucu-cucu, minimal musti sarjané. "
"Lho si oom apé kagak tahu ? Si Jum kan juga udah dapet gelar MBA ? " tanyé Mat Kelor sambil cekikikan. "Maksudnyé Married By Accident. Si empok melendung duluan gara-gara kecelakaan di bawah pohon pisang di belakang pos siskamling. "
"Sia'ul lu Mat. Ampek sekarang si empok masih ngarepin momongan, gimané bisa gendut duluan ? " katé Jumadi sambil terkekeh-kekeh. "Tapi mendingan deh daripadé elu bilang Married But Available. Biar udah kawin tapi celamitan tuh kalo liat jidat nyang licin sedikit !"
| 
