Pakansi ke Las Vegas (5)
Bang Madi / Indonesia Media
 "Nggak berasa cepet bener y é, abis juga waktu pakansi kité di Las Vegas, " katé Jumadi dengan muké berseri-seri. Maklum selama liburan lupa deh segalé susah payah ngumpulin lembaran ijo bergambar Andrew Jackson. Mata bisa bebas jelalatan dan mulut ngecoblak seenak udelnyé sendiri tanpa musti mikirin bakalan adé nyang kesinggung.
"Tapi inget, besok kembali lagi deh kité kehidupan nyata. Segalé mimpi udah berlalu. Besok mulain nyangkul lagi, " bales Mat Kelor sambil cengar-cengir juga.
Sementara si Qodir asyik ngeliatin pemandangan di luar dalam perjalanan balik ke Loma Linda, sambil siul-siul. Cuman si Pepen nyang mukényé ditekuk ajé, kayak anak kecil nyang abis disetrap babehnyé disuruh bediri di depan lemari.
"Mbok ya muka jangan dibuat panjang begitu seperti buah pepaya, lho mas Pepen, " katé si Qodir ngenasehatin. "Nanti rejeki jadi jauh !"
"Rejeki gue emang udah jauh, mau diapain ? Gara-gara elu sih Dir, gue batal jadi orang kaya !" katé si Pepen yang masih setengah keki.
"Lho kok aku yang disalahi ? Lha aku lewat di kasino saja ndak apalagi mampir ! " bales Qodir yang jadi kebingungan.
"Justru itu, Dir ! Elu sih kagak mau nemenin gue, malahan jalan-jalan amé Jumadi dan Mat Kelor melulu ! Gue kan udah menang, tapi nggak adé yang ngingetin gue supaya berenti maen. Akhirnya jeblok semua termasuk akar-akarnyé. " gerutu si Pepen.
"Lha elu kalo udéh menang, kenapé kagak berenti sendiri, Pen ?" tanyé Jumadi sambil setengahnyé ngebelain si Qodir.
"Gue pikir tanggung, baru dapet balik modal biaya hotel, makan amé bengsin. Siapé tahu bisa dapet dobel atawa tripel, buat laen kali kité balik lagi ke sini, " jawab si Pepen dengan lesu.
"Nah 'ntu namanyé serakah. Jangan katé si Qodir. Biarin di samping adé nenek lu nyang judes amé cerewetnyé kagak adé tandingannyé di kampung kité, pasti tetep ajé elu nangkring di situ, ampek duit lu ludes !" katé Mat Kelor ngikut belain si Qodir.
"Emang urat lu urat orang susah, kagak usah mimpi jadi milyuner. Nyang penting elu kerja, bisa makan, bisa ngirimin duit ke kampung, ya udah. kagak usah nyang muluk-muluk, " katé Jumadi nasehatin.
"Kalo mau jadi kaya, masukin duit lu ke celengan. Lama-lama numpuk tuh duit lu. Kalo bolak-balik elu cemplungin ke mesin jekpot, masuknyé ke kantong nyang punya kasino. Bukannyé elu tapi dié nyang tambah kaya, " tambah Mat Kelor setengah serius setengah ngeledek.
"Tapi ada lho mas, mesin yang pasti menang kalau kita masukkan uang. Makanya kalau mau masukkan uang perhatikan dulu lokasi, warna dan gambarnya, " katé Qodir dengan muké serius.
"Haram-jadah, Dir. Kenapé elu kagak ngomong dari kemaren-kemaren kalo elu tahu rahasianyé. Gimané kalo kité balik lagi ke Vegas, kan belon jauh-jauh amat ?" katé si Pepen yang mendadak sontak bangkit semangat empat-liményé, kayak tentara kité yang mau ngelibas soldadu Belandé di sandiwara TVRI.
"Biasanya mesin yang begitu adanya di dekat pintu keluar atau ke arah menuju kamar kecil. Pokoknya jauh dari kafetaria atau restoran, " katé si Qodir dengan nada serius.
"Tadi elu bilang adé ciri-ciri warna amé gambarnya. Apaan tuh, Dir ?" tanyé si Pepen kagak sabaran. Sementara Jumadi amé Mat Kelor masang kuping baek-baek. Siapé sih nyang kagak kepingin tahu kalo ada mesin yang pasti bikin kité menang terus ?
"Warna mesinnya merah dan ada gambar botol Coca-colanya, " celetuk si Qodir sambil terbahak-bahak.
"Ah sia'ul lu, Dir. Itu sih namanya vending machine. Tentu ajé bakalan menang terus kalo elu cemplungin duit ke situ ! " katé Mat Kelor amé Jumadi sambil ikut ketawa geli karena kali ini kena dikadalin si Qodir.
| 
