Pakansi ke Las Vegas (4)
Indonesia Media/
Bang Madi
 "Si Mat, Jum am é si Qodir udah berangkat nonton aer mancur, tinggal gue nih yang siap-siap berangkat ke kasino, " pikir Pepen dalem ati sambil ngaca dan siul-siul.
"Kalo maen di kasino itu musti rileks. Kalo ngotot malahan jeblok mulu kartuny é. Santai ajé, menang syukur, kalo kalah sialaaan, " katé si Pepen lagi masih dalem ati sambil cengar-cengir. Mendingan dech cuma dalem ati, daripadé ngomong sendiri. Belon juga kalah, masa udah sinting duluan ?
"Ternyat é anak Betawi kalo didandanin perlént é juga. Tapi biar lebih gayé musti pake jas dong. Apalagi kalo nasib lagi mujur, kartu gue terang terus, pasti bakalan dikerumunin cewek-cewek kécé. Dikirain gue pialang saham yang stock-nyé mencuat, lagi foya-foya di Vegas. " Wah rupanyé kebanyakan nonton film nih anak. Sebelon berangkat ke Vegas ajé, pilem James Bond terbaru, Casino Royale ditonton 3 x amé si Pepen.
"Tapi gue kagak boleh serakah apalagi takabur. Nah mendingan duit di dompet gue batesin. Kartu kredit gue tinggal aj é apé yé ? Ah tapi kalo sampek adé apé-apé repot kalo kagak bawa kartu kredit. Gue umpetin ajé di sela-sela dompet. " Dasar si Pepen, emangnyé kagak bisa ditemuin tuh kartu kredit, kan dié sendiri nyang ngumpetin ?
Setelah yakin nasibnyé lagi bagus malem ini, Si Pepen keluar kamar dan langsung turun ke lobby paké lift. Dengan ceria tiap orang yang masuk ke lift disapanyé. Siapé tauk kalo baek amé orang laen, peruntungan jadi tambah deket.
Sampek di lantai dasar buru-buru si Pepen jalan ke pintu keluar, maksudnyé mau jalan kaki ke kasino di hotel sebelah yang gedean. Siapé tahu makin gede itu kasino, makin murah hati yang punyanyé ngebagi-bagi duit. Siapé nyana tiba-tiba adé bule yang ngelemparin kunci mobilnyé ke si Pepen sambil ngomong, "Tuh mobil gue Corvette nyang warna merah. Gue Bob, kamar 1207 !"
"Makdikipé, biar nyaho tuh orang ! Emangnyé gue bagian markirin mobil tamu hotel !" katé si Pepen sambil ngomel-ngomel, sementara petugas valet nyang beneran sambil senyum-senyum nyamperin si Pepen dan minta kuci mobil si bule.
Dengan ati nyang masih mangkel si Pepen jalan ke hotel sebelah. Tapi begitu masuk hotel dié inget, kalo mau maen di kasino ati musti lapang, pikiran jernih. Kalo cemberut dan muké ditekuk, mané mau dewi Fortuna deket-deket ? Jadinyé si Pepen kagak jadi langsung ke kasino, tapi belok dulu ke kamar kecil buat cuci muka sambil nenangin diri.
Sampek di dalem ternyaté kagak adé orang laen. Si Pepen jadi bengong ngeliat kamar kecil nih hotel. "Kalo wc umumnyé ajé udah bagus begini, pegimané kamar suite-nyé ?" Di deket sink-nyé ajé ditaroin keranjang isi macem-macem lotion dan parfum. Jadi timbul dech isengnyé ngaduk-ngaduk isi keranjang buat ngeliatin botol kecil-kecil nyang emang imut-imut.
Saking asiknyé si Pepen kagak berasa kalo adé bule yang masuk, buang aer kecil, terus cuci tangan di sebelahnyé. Eh setelah selesai, sebelum keluar dari kamar kecil, si bule narok duit dua dollar di depan si Pepen.
"Apé abis make kamar kecil musti bayar ? Tapi kenapé narok duitnyé di depan gue ? " pikir si Pepen dalem ati sambil kebingungan. "Ah sialan tuh bule. Kali dikirain gue bagian bersih-bersihin wc, jadinyé dikasih persenan ! Mendingan gue balik ajé ke kamar. Belon juga maen udah ketiban sial mulu !"
Sambil ngedumel si Pepen keluar dari itu hotel, eh siapé sangké amprokan amé temen-temennyé nyang abis nonton aer mancur dan mau nonton pertunjukkan bajak laut di hotel Treasure Island. "Lha Pen, kayaknyé baru bentaran elu ke kasino, kok udah keluar ? Menang banyak romannyé nih anak !" katé Mat Kelor.
"Boro-boro menang, Mat ! Maen ajé belon udah sial mulu. Keluar hotel dikirain tukang parkir, di wc hotel, gue dikirain cleaning service !" gerutu si Pepen.
"Lha elu pake jas salah warna sih ! Kalo di Indonesia pake jas warna kuning gitu, elu dihormatin, dikirain pejabat Golkar. Di sini sih kagak heran elu disangké pegawai hotel !" katé Mat Kelor sambil terbahak-bahak.
| 
