Pakansi ke Las Vegas (3)
Bang Madi/ Indonesia Media
 "Giman é entar sore. Lu pad é mau ikut gue maen, apa kagak ?" tanyé si Pepen yang tangannyé udéh gatel bener pengen maen judi.
"Gue am é Jumadi mau nonton pertunjukkan yang gratis ajé. Nggak tahu dech si Qodir. Kité sih mau ke Bellagio, nonton aer mancur, " jawab Mat Kelor sambil baca majalah lokal Las Vegas yang isinyé tentang apé ajé yang bisa diliat di Las Vegas.
"Itu sih bukan air mancur namanya, mas. Yang namanya mancur itu, airnya dari atas ke bawah, seperti pancuran air di kampung. Lha kalau dari bawah ke atas itu namanya air muncrat !" kata si Qodir sambil cengegesan dan nunjuk foto di majalah yang lagi dipegang Mat Kelor.
"Mau mancur kek, nyemprot kek, nyembur kek, yang penting aernyé goyang-goyang sambil disorotin lampu amé adé iramanyé. Kan kité jadi inget amé aer mancur menari di Monas, " celetuk Jumadi.
"Si Jum jadi nostalgila tuh, inget waktu ngegombalin si mpok, di Monas, " katé Mat Kelor ngegodain Jumadi.
"Janjinyé seidup-semati, tapi bini betaon-taon ditinggal ngerantau. Dié sih enak-enakan jalan-jalan ke Vegas, padahal bini di kampung nyoretin kalender sambil ngitungin hari, kapan kakanda pulang, " tambah si Pepen.
"Biar jauh nyang penting si Jum setié ! Banyak nyang kagak tahan, akhirnyé di rantau nyari bini lagi. Tinggal anak-bini di kampung kebingungan kok mendadak kiriman duit setop ?" katé Mat Kelor ngebelain temennyé
"Kalo si Mat am é Jumadi mau jalan-jalan, elu temenin gue yé, Dir, " ajak si Pepen.
"Yah, terserah mas saja, " jawab Qodir dengan berat hati. Kepengennyé sih ikut jalan-jalan, tapi berhubung si Pepen yang ngebayarin hotel, si Qodir jadi kagak enak ati.
"Elu mau maen jekpot, Pen ?" tanya Jumadi.
"Jekpot sih maenan anak bawang, " samber Pepen. "Kalo gue kan udeh kelas berat, maennyé yang pake meja dong. "
"Maen ping-pong kali yang pake meja ?" celetuk Mat Kelor sambil ngakak.
"Sia'ul lu, Mat. Maksud gue maen kartu. Kan musti pake meja. Emangnyé anak kecil, maen kartu di ubin ?" jawab Pepen kagak mau ngalah.
"Wah kalau mau main kartu saya ikut lah mas, " kata Qodir yang mendadak muncul semangatnyé yang tadinyé udéh patah areng. "Nanti saya jadi pasangannyé mas Pepen. Mau main kartu apa, mas ? Remi, empat-satu atau domino ?"
"Lu kira kité lagi siskamling, maen gaplek ? Nyang tarohannyé rokok ? Lu kalau mau ikut maen musti masang duit, Dir. Dan maennyé poker atawa blackjack, " katé si pepen sengit.
"Oke-oke, saya masang duapuluhlima sen saja. Kalau kalah kan ndak apa-apa. Anggap saja koinku kecemplung selokan, " kata si Qodir nyantai. "Saya pilih blackjack saja yang gampang. Kartu yang ada gambar jack-nya dan warnanya hitam kan cuma ada dua. "
"Maen blackjack itu duitnyé gede, Dir. Kagak bisa sen-senan. Elu musti beli chips dulu !" katé si Pepen dengan keki.
"Lha ya ndak perlu beli. Aku kan bawa chips yang beli di toko 99 cents. Ada yang rasa keju, barbeque dan jalapeno, " bales si Qodir sambil cengar-cengir.
"Itu sih potato chips ! Maksud gue chips itu koin plastik pengganti duit, Dir !" katé si Pepen yang makinan sebel amé si Qodir, "Udah dech elu sono ngikut Mat Kelor amé Jumadi ngeliat aer mancur, daripadé bikin pusing kepalé gue !"
"Kalau maunya mas begitu, yah, aku sih ikut siapa saja oke, " katé si Qodir dengan lega. Sebenernyé dié udah tahu dikit-dikit mengenai kasino dari obrolan amé temen-temen, tapi belagak bego ajé biar si Pepen nyerah.
| 
