Highschool Musical 2
Bang Madi
/ Indonesia Media
Jauh-jauh hari, Pepen udah ngasih ultimatum ke temen-temenny é. 'Ntar tanggal 17 Agustus jam 5 sore waktu Pasifik, jangan ada yang ganti-ganti saluran teve. Udah dipantek tuh channel teve beberapa hari sebelonnyé amé si Pepen, jangan coba-coba deh adé yang berani ngerobah !
"Aku ndak nyangka, mas Pepen itu rasa nasionalisnya tinggi, " kata Qodir sambil memuji-muji. "17 Agustus sudah disiapkan jauh-jauh hari. Pasti ada siaran langsung dari Jakarta memperingati hari kemerdekaan kita. "
"Dir, Dir ! Masak 17 Agustusan ada siaran langsungny é ke Amerika ? " kata Jumadi sambil geleng-geleng kepala. "Pasti ada acara khusus dari Playboy mansion-nyé si Hugh Heiffner, mangkényé si Pepen getol banget !"
"Apé dia ngikutin undian yang pengumumannyé hari ini tanggal 17 Agustus ?" kata Mat Kelor santai. Maklumin ajé si Pepen emang yang paling ngotot mau jadi orang kaya.
"Lu pad é ngomongin apaan ? " kata Pepen sambil ngedumel. "Bentar lagi bakal diputer siaran perdananyé Highschool Musical jilid 2. Mendingan bacot lu padé ditutup, daripadé di-laler-in !"
"Astagafirullah, Pen, Pen ! Gue kirain adé apé segitu ngototnyé mau nonton teve ?" seru Jumadi kaget. Untung nggak jantungan.
"Nggak malu amé umur, Pen ? ABG ajé nggak segitu ngototnyé mau nonton tuh pelem, " tambah Mat Kelor sambil ketawa.
"Mungkin waktu SMA dulu mas Pepen ini ndak pernah hura-hura, jadi sekarang baru kesampean pubernya, " goda si Qodir. Bisa ajé nih anak.
"Lah, lu pad é kagak jujur. Sebenernyé demen juga, tapi pura-pura ! Mat, lu nonton yang jilid pertama ajé berapa kali ?" kata Pepen nggak mau kalah.
"Terang ajé gue nonton ntu pelem melulu. Teve cuma atu, remote-nyé lu kekepin terus, " bales Mat Kelor.
Singkat cerité, akhirnyé keempat sekawan nonton sama-sama. Abis itu, biasa, bawaan-nyé orang kité abis nonton apaan ajé pasti adé ajé komentarnyé.
"Enak juga jadi si Troy Bolton, yé. Banyak yang naksir. Udah gitu cakep-cakep semua, " kata Pepen sambil setengah ngelamun.
"Jangan bandingin am é masa lalu elu dong, Pen. Jelas mané adé temen SMA lu yang naksir amé elu. Udah tampang pas-pasan, dompet cekak !" goda Jumadi sambil terkekeh-kekeh. "Cewek-cewek kan demennyé ditraktir somay kék, bakso kék. Nah si Pepen, naek biskota ajé numpang. "
"Udah ganteng, si Troy pinter maen basket. Kalo si Pepen cuma gap é maen congklak doang !" tambah Mat Kelor ngeledekin temennyé.
"Untung banget anak sini dibanding am é adék-adék kité di kampung. Liburan sekolah bisa dapet kerjaan sambilan. Gajinyé bisa buat beli mobil bekas, " kata si Pepen yang masih ngebayangin cerita di pelem.
"Di negeri kité, yang kerja banting-tulang, kepala jadi kaki, kaki jadi kepala, boro-boro bisa beli mobil bekas paké. Mobil bekas ketabrak kereta ajé belon tentu nyanggup, " celetuk Mat Kelor sambil tebahak-bahak.
"Boro-boro, mas, di sana anak sekolahan bisa dapat kerjaan. Lha wong yang sarjana saja pada nganggur !" kata Qodir memelas.
| 
