Beckham Mania
Bang Madi / Indonesia Media
 Si Pepen pulang ke apartemen sambil bergaya dengan kaos seragam tim sepakbola LA Galaxy nomor 23 dengan tulisan Beckham. Emang Los Angeles dan sekitarnya sedang dilanda Beckham Mania, dengan hijrahnya sang raja sepakbola asal Inggris ke Los Angeles.
"Lu boleh dapet dari mana tuh kaos, Pen ? Asli atawa palsu ? " tegor Jumadi yang sebenernya kepingin banget punya kaos kayak gitu, tapi segera mundur setelah tahu harganyé cepek dollar.
"Palingan modal jigo, dapet dari Swapmeet, " celetuk Mat Kelor sambil cengengesan.
"Enak ajé, ini asli, liat ajé tulisan di label-nyé, " katé si Pepen sambil nunjukkin bagian belakang kaosnyé.
"Kok tulisannyé, belon lunas ? Emang lu ngutang ? " celetuk Mat Kelor sambil pura-pura ngebaca label di kaos temennyé.
"Sia'ul lu, tapi emang gue bayar paké kartu kredit. Tapi nanti abis bulan gue bayar lunas. Nggak bakalan lagi dech gue bayar kartu kredit sebagian. Bunganyé gila-gilaan, " jawab si Pepen.
"Enak yé jadi David Beckham, dateng ke sini disambut gede-gedean, " kata Jumadi.
"Tentu ajé, Jum. Dié dateng ke sini kan diundang, yah pasti disambut. Kalau kité-kite kan dateng kagak diudang, jadi bukan disambut, tapi disambit, " samber Mat Kelor sambil ketawa.
"Tapi bedanyé kité kan kerja di sini di kerjaan yang orang Amerika kagak mau kerjain. Jadi adé gunanyé juga kité ke sini, " kata Pepen membela diri.
"Beckham juga sama. Orang Amerika kagak mau nendang bola, susah ! Maunyé main football Amerika yang gampang, tuh bola cuma dibawa-bawa lari ajé, " bales Mat Kelor sambil terkekeh-kekeh
"Cuma modal jago nendang ajé, bisa dapet bayaran gitu gede, 250 milyar dollar ! " kata Jumadi sambil geleng-geleng kepala.
"Padahal si Pepen juga jago nendang. Dulu waktu jadi hansip di pasar, suka nendangin dagangannyé pedagang kali lima yang bandel-bandel, yang jualan sampek ke jalanan, " samber Mat Kelor lagi.
"Sama-sama jago nendang, bedanya Beckham nendang bola, si Pepen nendang bakul, " tambah Jumadi sambil ketawa.
"Orang Amerika berani bayar Beckham segitu gede, apé kagak rugi ?" tanya si Pepen sambil ngebayangin mau beli apaan kalo punya duit segitu. Lagian nggak usah ngarepin menang lotto kalau penghasilannyé segitu gede.
"Jelas, nggak dong. Semua kan adé perhitungannyé. Keluar duit segitu pasti udah diitung dapetnyé berapa kali lipet, " kata Jumadi.
"Lagian Amerika nggak bakalan rugi, kan pasti Beckham bayar pajak penghasilan, " kata Mat Kelor sambil senyum-senyum, "Nggak kayak elu Pen, nyari kerja dobelan yang di bawah tangan biar kagak bayar pajak. "
"Udah gitu bayar pajak serebu, dapet balik tiga ribu. Ngakunyé punya tanggungan, padahal anak orang yang dimasukin ke laporan pajeknyé, " tambah Jumadi ngegongin ocehannyé Mat Kelor
"Tapi gue rasa sepakbola nggak bakal jadi populer di sini dengan datengnyé Beckham. Apalagi orang-orang Meksiko padé benci semua amé Beckham, " pancing Mat Kelor.
"Ah setahu gue semua orang termasuk orang Meksiko banyak yang nge-fans amé Beckham, " protes si Pepen.
"Gimana mereka ngak benci ? Orang Meksiko pikir dulu mereka dateng ke sini ngambil kerjaan orang Amerika, eh sekarang bule satu ini dateng dari Inggris buat ngebales ngambil kerjaan orang Meksiko di Amerika !" kata Mat Kelor sambil terbahak-bahak.
| 
