Jajan
(
Bang Madi
/ IM)
 Hari Minggu pagi di awal musim panas Mat Kelor cs jalan-jalan di swap meet di Bloomington yang luasny é segede-gede jidat. Yang punya rencana sih si Pepen. Katényé mumpung kalo pagi belon panas, jalan-jalan sekalian olahraga. Tapi sampek di sono baru ketahuan belangnyé si Pepen, mau cuci mata doang. Soalnyé matanyé udah sepet, tiap hari di kerjaan cuma ngeliatin tampang orang bloon. Di rumah yang dilihat cuma tampang Mat Kelor cs yang bikin eneg ajé. Bloon sih kagak. Tapi karena kerjaan di Amrik otot yang lebih banyak dipaké dibanding otak, jadi padé rada-rada tel-mi, gitu ! (telat mikir)
Kalo temen-temennyé udah padé ngejinjing tas kresek isi macem-macem, kripiknye orang Meksiko, buah-buahan, kacang garing de-el-el, si Pepen masih lenggang kangkung, kangkung dari Betawi. Nasib tidak beruntung; naksir cewek, nggak tahunyé banci. (Maksudnyé mau cerita, jadi berpantun nih bang Madi).
"Liatin tuh si Pepen asyik ajé ngeloyor sendirian, " bisik Jumadi, "lupa amé kité !"
"Apaan, Jum ? Di pasar seramé gini lu bisik-bisik. Mané gue bisa denger ?" protes Mat Kelor. "Maksud lu si Pepen ? Tauk tuh. Kité sih kerongkongan yang haus. Kalo dié matanyé yang haus, jelalatan terus ngeliatin cewek-cewek. "
"Kité dari tadi jajan, beli macem-macem, dié matanyé doang yang jajan !" kata Jumadi sambil ketawa.
"Nggak apé-apé deh cuma matanyé doang yang jajan. Kalo bagian laen yang jajan kayak model lelaki hidung belang, bisa berabé. Bisa singit jalannyé kayak layangan putus, kalo sampek kepatil, " bales Mat Kelor sambil tebahak-bahak.
"Hus-hus. mas-mas ini mbok volume suaranya dikecilkan. Nanti ndak enak kalau kedengaran orang Indonesia, " tegor si Qodir.
"Jadi serba salah nih gue, " kata si Jum sambil geleng-geleng kepala. "Tadi bisik-bisik salah, tereak-tereak salah jugai. "
"Gue heran juga amé orang kité. Kalo orang bangsa laen, begitu ngedenger adé yang ngomong paké bahasanyé, langsung nyamperin. Kalo orang kité ngedenger adé yang ngomong paké bahasa kité. langsung minggir. Jauh-jauh deh, adé orang Indonesia di situ. " kata Mat Kelor sambil cengar-cengir. Bukan gossip lho, emang kenyataan.
"Lha itu kan gara-gara politik devide et impera-nya wong Londo. Makanya bangsa kita terpecah-pecah, " kata Qodir. Biasa, enak kan nyalahin orang laen dibanding nyalahin diri sendiri.
"Tapi kita kan udah lebih 60 tahun merdeka, Dir. Masak nggak bisa mikir ? Liatin ajé di sini organisasi kedaerahan dan keagamaan menjamur di mané-mané. Bandingin sama organisasi yang bersifat kebangsaan tanpa ngelihat latar belakang suku, agama, ras dan golongan ?" kata Jumadi dengan sewot. Kalau ikut pertandingan orasi di tujuh belasan bisa jadi juara nih, romannyé si Jum.
"Eh, kité keasyikan ngobrol, nggak tahu udah kemané tuh si Pepen, " kata Mat Kelor sambil celingukan nyariin si Pepen di tengah gitu banyak orang. Kayak nyari jarum di tengah jerami. "Masalahnyé si Pepen yang megang kunci mobil. Masak kité musti pulang jalan kaki ? Kapan nyampényé ?"
"Ah gampang nyarinyé, Mat. Palingan dié masih jajan. Cari aja tempat yang banyak noné-noné paké baju yang model kekurangan bahan. Yang bagian depannyé cuma kayak ditutupin selampé. Pasti si Pepen ngendon di sono !" kata Jumadi sambil cengengesan.
"Yang kesihan entar malem elu, Dir, yang jadi korban !" kata Mat Kelor ngegodain si Qodir.
"Lho memangnya saya ini kambing tho, mas ? Masak dijadikan qurban ?" tanya si Qodir yang nggak ngerti kalo lagi digodain Mat Kelor.
"Bukan gitu, Dir. Si Pepen matanyé kebanyakan jajan, entar malem kebawa ngimpi. Elu yang temen sekamarnyé yang ketiban pulung. Ngimpiin senorita-senorita, elu yang diraba-raba, " kata Mat Kelor sambil terbahak-bahak.
| 
