Rambut (jilid 2)
Bang Madi
/ Indonesia Media
 "Ngomongin soal rambut emang paling asyik, " kata Jumadi membuka percakapan. "Donald Trump samp ék sekarang masih suka jadi bulan-bulanan cewek-cewek di acara The View. "
"Yang gue heran, di é kan duitnyé dimakan 7 turunan kagak abis-abis. Kenapé nggak operasi transplantasi rambut ?" katé si Pepen yang mulain ikut tertarik omongan si Jum.
"Jangan-jangan di bagian tubuhny é yang laen lebih parah, kagak adé rambutnyé. Jadi mau ngambil rambut dari mané bakal tranplantasi ?" bales si Jum nyantai.
"Atau dié orangnyé kuatiran, " celetuk Mat Kelor sambil cengengesan.
"Kuatir operasinyé gagal, maksud lu ?" tanya Jumadi yang sering nggak nyadar sebenernyé Mat Kelor sering mancing-mancing dulu sebelon ngegetok.
"Kuatir kalo ngambil dari bulu kéték, entar kepalanyé basah terus, " jawab Mat Kelor sambil ngakak. "Kalo ngambilnyé dari selangkangan, entar bediri terus tuh rambut, maklum dié kan dikelilingin cewek-cewek cakep mulu. "
"Gue pikir orang-orang yang rambut-nyé di-comb over model Donald Trump, rasa percayé dirinyé kurang. Kalo rambut udah abis, ya udahlah. Kenapé musti ditutup-tutupin paké rambut yang bagian pinggir. Giliran ketiup angin jadinyé malah ancur Miné, " kata Pepen sambil ketawa juga.
"Banyak orang gundul malahan tambah ganteng. Lihat tuh Telly Savalas atawa pemain-pemain basket, " tambah si Jum.
"Tergantung bentuk kepalanyé, dong. Kalo gede dan bulet kayak Shaq ya bagus. Tapi kalo peyang kayak kepalé si Pepen, mané pantes kalo botak ? " samber Mat Kelor sambil terbahak-bahak.
"Kepalé lu kalo botak juga kagak pantes, Mat. Waktu kecil palé lu kan borokan, mané bisa dicukur licin tuh kepala, " bales Pepen sambil terbahak-bahak pula.
"Lu padé tahu nggak rasa nasionalisme seseorang itu bisa dilihat dari rambutnyé ? " pancing Mat Kelor lagi.
"Maksud lu ?" tanya Jumadi yang kepancing lagi.
"Yang rambutnyé gondrong itu orang yang cinté tanah air, " kata Mat Kelor sambil senyum-senyum.
"Ah, apé hubungannyé rambut gondrong amé cinta tanah air, " celetuk si pepen nggak percaya.
"Jelas dong. Indonesia tanah air beta ! Sambil nyisirin rambut di depan kaca, sambil ngebayangin pohon kelapa. Melambai-lambai nyiur di pantai, " kata Mat Kelor sambil ngakak sembari megangin perut.
Abis berenti ketawa, Mat Kelor nyambung lagi, "Kalo yang rambutnyé belah tengah itu Pancasilais sejati, keadilan sosial bagi seluruh rakyat Indonesia. Adil kan belah tengah !"
"Nah sekarang apé bedanyé yang model rambutnyé kuping keliatan amé yang kupingnyé ditutupin rambut ?" pancing Jumadi. Siapé tahu Mat Kelor kagak bekutik kalo ditanyain yang susah-susah.
"Ah itu sih gampang, Jum. Kalo kupingnyé ketutupan rambut itu pasti bekas orang rejim orde baru. Adé hal-hal yang musti ditutup-tutupin, " jawab Mat Kelor yang emang pinter ngeles. "Sedang kalo kupingnyé keliatan, itu pendukung reformasi. Era keterbukaan !"
"Kalo yang botak itu korban reformasi, " samber Pepen kagak mau kalah, "Udah kagak adé sisanyé, semuanyé dikorupsi amé pejabat dan anggota dewan !"
| 
