Senjata Api
Bang Madi / IM
"Si Qodir mana ?" kata Jumadi sambil tergopoh-gopoh.
"Emangnyé adé apé, Jum ? Lu kayak
dikejar setan ajé ! " kata Mat Kelor dengan
santai. "Kalau uang lu hilang, barangkali cuman keselip
atawa lu lupa kalo udah lu belanjain. Si Qodir sih gue tahu
pasti orangnyé jujur, kagak bakalan nyolong. "
"Bukan gitu, Mat. Nih gue ketemuin majalah di kamarnya.
" kata Jumadi yang masih nyolot ajé.
"Majalah porno ?" tanya Pepen dengan santai juga.
"Kali dia cuman kepingin tahu. Kalo cuman ada satu
majalah sih kagak perlu terlalu khawatir. Kalau banyak,
baru cilaka. Itu namanya udah kecanduan."
"Bukan, ini majalah khusus mengenai senjata api, "
kata Jumadi sambil nunjukkin itu majalah ke kedua temennyé.
"Wah, barangkali ajé dié dapet khabar
kalo si Nunung, tunangannyé di Bantul sané
mau dikawinin amé orang lain. Jangan-jangan nih anak
mau bunuh diri !" kata Pepen mulai ikut-ikutan si Jum,
mulai rada khawatir.
"Atau jangan-jangan dié mau bunuh orang. Emang
belakangan dié ngomel terus soal supervisor-nyé.
Katényé anak baru udah dapet kenaikkan gaji
amé promosi, sementara dié dari dulu segitu-gitu
ajé. " kata Jumadi sambil mikir-mikir kira-kira
apé yang adé di pikiran si Qodir.
"Jangan-jangan si Qodir udah enek banget amé
kité. Kité kalo ngeledekkin si Qodir suka
kebangetan, " kata Mat Kelor nyantai. Lagian ngapain
khawatir banget gara-gara cuman nemuin satu majalah doang.
"Paling nggak yang ditembak si Pepen duluan. Dié
tuh yang suka sengit amé si Qodir. "
"Wah kagak salah lagi deh dugaan lu, Mat. " Kata
Pepen tambah khawatir. "Lu tahu kan, si Pancho, temen
kerjanyé si Qodir? Tuh orang tampang colo-colo. Pasti
dié anggota genk-nyé orang Meksiko di sini.
Si Qodir pasti diojok-ojokin si Pancho, tembak ajé
temen-temen lu kalo macem-macem terus. "
"Gara-gara si Jum, semua orang jadi kalang kabut,
" kata Mat Kelor sambil ketawa. "Mangkényé
jangan suka iseng ngobrak-abrik banda orang."
"Bener Mat. Gue juga jadi ikut-ikutan was-was gara-gara
si Jum, " kata Pepen yang mulai berubah jadi lega ngelihat
Mat Kelor yang nyantai ajé dari tadi. "Dulu
si Jum ribut-ribut ngelihat adé satu pak kondom di
kamar gue. Dikirain gue udah jadi don juan. Padahal gue
salah comot. Gue kirain permen ! Abis tulisan di bungkusnyé,
ada yang rasa strawberry, ada yang vanilla. "
"Si Qodir udah ngomong amé gue. Temen-temen
di sini kan banyak yang babehnyé di Indonesia suka
nembak. Nah deket kampungnyé si Qodir banyak babi
hutan. Kenapa nggak dikembangin buat wisata berburu ? Mangkényé
dia jadi cari tahu soal tembak-menembak. " kata Mat
Kelor lagi.
"Oh gitu, bilang kek dari tadi, " kata Jumadi
dengan lega. "Mendingan deh dia pelototin terus tuh
gambar-gambar pestol, daripadé melototin gambar perempuan.
"
"Bener Jum, buat lelaki, senjata api emang banyak
kelebihannyé dibanding perempuan, " kata Mat
Kelor sambil cengengesan.
"Maksud lu, Mat ? " tanya Pepen kepingin tahu.
Emang tiap kali denger kata perempuan si Pepen langsung
kontak, jakunnyé naik turun.
"Senjata api itu selalu setia amé yang punya,
" kata Mat Kelor sambil ketawa. "Biar katé
kantong kité lagi cekak, tetep ajé kagak pernah
ngambek."
"Mau dipaké kapan ajé bisa, " samber
Jumadi sambil terbahak-bahak. "Kagak pernah minte peré.
"
"Kalo udah bosen, gampang ajé lu tuker amé
yang baruan, " tambah Pepen kagak mau kalah.
"Kalo lu demen amé punya temen baek lu, pasti
dié nggak keberatan minjemin. Malah nyuruh lu paké
kapan ajé. " samber Jumadi lagi.
"Tapi yang paling penting, senjata api bisa dipasangin
peredam. Jadi kagak adé suaranyé, " kata
Mat Kelor sambil terpingkal-pingkal.
(Bang Madi/ IM)
| 
