Orang Baru vs Orang Lama
(Bang Madi/ IM)
 Dari man é ajé lu, Pen ?" tanya Jumadi pas ngelihat batang hidung si Pepen di pintu apartemen. Jam dinding saat itu sudah menunjukkan pk. 1 lewat. "Pacaran sih boleh ajé, tapi kira-kira dong. Subuh-subuh kan elu udah musti berangkat kerja !"
"Elu lagi, Jum, kayak punya anak gadis ajé, khawatir banget, " kata Mat Kelor sambil terkekeh-kekeh. "Si Pepen kan udah bangkotan, kagak perlu dikhawatirin. Kalo anak gadis orang ampek melendung biarin ajé dié sendiri yang tanggung jawab. "
"Ya, tapi nanti apartemen kita tambah sumpek karena nambah orang lagi, " kata Qodir sambil ngedumel, "Dan tentunya aku yang ditendang musti tidur di kamar tamu, karena ada istrinya mas Pepen. "
"Gue jadi terharu nih elu padé perhatian amé gue, " kata Pepen rada cuek. "Ampek jam segini belon padé tidur, gara-gara nungguin gue pulang. "
"Siapé yang begadang nungguin elu ? Kité lagi asyik nonton pelem horor. Liatin tuh si Qodir sampek mengkeret di pojokan, " kata Mat Kelor sambil nunjuk si Qodir yang emangnyé paling penakut.
"Boro-boro pacaran, Jum. Tiap kali ada cewek yang gue taksir, baru mau gue colek dikit aj é udah padé minggir. Kali takut bekas towelan gue bakalan jadi bisul, " kata Pepen sambil cengengesan. "Gue ke rumahnyé si Mahmud, tetangga uwak gue di Cirebon dulu. Babehnyé kan udah seminggu ngunjungin anaknyé di sini. Entar gue dikaté sombong kalo nggak nyempetin nemuin babehnyé. "
"Kalo diitung-itung orang Betawi ternyata banyak juga ya di sini. Boleh juga tuh kita bikin Ikatan Masyarakat Betawi di Amerika chapter Kalifornia Selatan, biar adé persatuan, " kata Jumadi yang tiba-tiba muncul idenya. Siapé tahu nantinyé bakalan bisa jadi kekuatan sosial politik.
"Orang Betawi tuh nggak usah diiket-iket juga udah bersatu. Kité juga nggak pernah pusing-pusing soal simbol-simbol dan kedaerahan. Pokoknyé semua yang pernah tinggal di Jakarta baek dié orang Jawa kek, Sunda kek , Madura, Tionghoa de-el-el, asal fasih ngomong gue-elu dan kagak gampang kesinggung kalo diajak becanda, kité terima sebagai orang Betawi. Bang Ali Sadikin kan orang Sunda aslinyé. Bang Nolly amé bang Yos asal Jawa. Tapi semuényé kita terima sebagai sesepuh orang Betawi, " kata Mat Kelor yang emang jalan pikirannyé yang simpel-simpel ajé seperti ucapannyé Gus Dur, gitu aja kok repot-repot.
"Bener, Mat. Yang penting buat orang Betawi itu silaturahmi pas Hari Raya dan tujuhbelasan di konsulat, "tambah si Pepen.
"Lu ngomongin apé ajé, Pen amé babehnyé si Mahmud ? " kata Jumadi yang tiba-tiba inget amé pembicaraan semula.
"Menurut pengalaman dié selama di sini orang Indonesia yang udah lama di sini suka padé sengak lagunyé. Kali bangga kalo udah jadi warganegara sini, " kata Pepen.
"Padahal lebih gampang jadi warganegara sini daripada jadi WNI. Di sini asal ikut peraturan pasti beres. Di sono kalau cuma ikut peraturan ajé, sampai tujuh turunan kagak bakalan dapet, " kata Mat Kelor sambil terbahak-bahak.
"Iyé gue bingung juga tuh adé yang sejak engkong buyutnyé udah lahir di sono tapi sampek sekarang statusnya masih WNA atawa stateless, " kata Jumadi sambil geleng-geleng kepala.
"Kalo mau bedain orang Indonesia yang baru datang di Amerika amé yang udah lama sebenernyé gampang. Yang paling ahli ngebedain orang kité yang kerja di MacDonald, " kata Mat Kelor sambil cengar-cengir.
"Apa itu bedanya, mas, " samber si Qodir yang dari tadi cuma ngedengerin orang ngomong ajé.
"Gampang, Dir. Kalo datang empat orang Indonesia terus mesen 4 paket komplit yang udah termasuk burger, kentang amé minum, pasti orang lama. Kalo yang datang 4 orang, tapi mesennya 1 paket tambah 3 burger, pasti orang baru. Minumnyé gantian, " kata Pepen sambil terbahak-bahak.
"Yang kerja di Chinese Restaurant juga tahu, mas, " kata Qodir nggak mau kalah. "Kalau orang lama datang berdua, pasti pesanannya 2 paket. Kalau orang baru, cuma pesan 1 paket, tapi minta sendoknya dua !" Bisa juga nih anak.
"Orang yang baru datang kagak tahu kalo saos tomat di sini dibilangnyé ketchup. Mangkényé abis mesen burger amé kentang pasti minta tomato sauce, bikin yang kerja di MAcDonald bingung. Abis yang terima order engeh, dan bilang oh you mean ketchup, eh orang kité malah ngotot, sambil ngejawab, kecap mah bakal makan nasi, kalo kentang jodohnyé saos, " kata Mat Kelor sambil tertawa terbahak-bahak.
| 
