TAHUN BARU
(Bang Madi/ IM)
 "Gini ye, nasib orang di perantauan. Maleman tahun baru kagak ade acara. Kagak tahu mau ngapain ?" kata Pepen tiba-tiba teringat malam tahun baru yang udah di ujung mata.
"Oh iye, kalau di Jakarta sih rame. Inget nggak, Mat ? Lu ngajakin si Ipeh, anak kampung sebelah nonton kembang api di Ancol. Pulangnye si Ipeh pade biru-biru, " kata Jumadi menyambut obrolan si Pepen.
"Gile lu Mat, anak orang lu apain ? " tanya Pepen kebingungan, "Hot amat lu ye ? Bagus orangtuenye nggak ngelabrak nyak-babe lu minta supaye lu tanggung jawab. "
"Ah, mas Pepen ini selalu berpikiran negatip, " kata si Qodir ngikutan nimbrung buka mulut. "Mungkin pacarnya mas Mat kena ledakan mercon sundut. "
"Ah elu sih Jum, kalo ngomong cuma setengah-setengah bikin orang pade mikir yang enggak-enggak, " kata Mat Kelor sambil negor si Jum. Nyalahin orang emang paling enak.
"Bukan gitu, Mat. Gue belon selesai ngomong. Bacot gue masih ngablak, si Pepen udah nyamber aje kayak ayam jago, " jawab Jumadi membela diri.
"Emang umuran si Pepen udah pantesnye punya momongan. Mangkenye ape aje maen disamber. Asal jangan jemuran tetangga disamber juga, " kata Mat Kelor yang nggak boleh ngelihat peluang buat balik ngecengin temennye.
"Apalagi kalo sampe bini tetangga yang disamber. Bisa nangis-nangis enyak si Pepen, punya mantu bule, " kata Jumadi nambahin, sambil terkekeh-kekeh.
"Lho, lho, kalau mas Pepen dapat orang bule kan ndak ada salahnya tho mas. Mau putih, kuning, coklat, hitam kan sama-sama manusia, " kata Qodir niruin pejabat kite kalau lagi ngebahas soal SARA. Padahal prakteknye tetep aje yang minoritas diteken sampe mencret.
"Nenek-nenek pegimane mau ngomongnye ame mantu ? Nah si Pepen aje yang udah lama tinggal di sini, palingan cuma nunjuk-nunjuk pintu WC kalo mau minta jatah ame bininye, " kata Mat Kelor sambil meledak ketawanye.
"Seneng deh pade ngeledekin gue. Balik lagi soal biru-biru tadi, gue masih penasaran. Lu apain anak orang, Mat ?" kata si Pepen supaya nggak dicengin lagi.
"Namenye pengangguran, ngajakin pergi anak gadis orang. Duit cuma cukup bakal ongkos naek mikrolet. Kepaksa pulangnye jalan kaki. Boro-boro metro mini, taksi aje pade penuh. Mangkenye betisnye si Ipeh besokannye pade biru-biru, " cerita Mat Kelor sambil ngingetin jaman susah dulu di negara sendiri. Emang bener kate pepatah, hujan emas di negeri orang, hujan batu di negeri sendiri. Gimane rakyat kagak kebagian batu doang ? Emasnye dikekepin ame yang punya jabatan !
"Balik lagi soal maleman tahun baru. Jadinye mau ngapain kite nanti ? " kata Pepen ngingetin ke omongan semula.
"Tergantung mau pade keluar duit berape ? Mau seneng-seneng tapi kagak mau buka dompet, mane bisa ? " kata Mat Kelor, " Jangan bacot aje yang pade dibuka. Duit dong yang dikeluarin, jangan ludah aje. "
"Ya sudah, kita buat acara yang murah meriah saja. Nanti saya godog wedang jahe biar badan hangat. Kita setel lagu dangdut biar asyik joget semalam suntuk, " kata Qodir menyumbangkan pikiran.
"Joget cuma barengan sama elu-elu pade ? Boro-boro semalem suntuk, belon satu lagu abis, gue udah enek ngelihat tampang-tampang elu, " kata Mat Kelor sambil terbahak-bahak.
| 
