CINTE MONYET
Written by (Bang Madi/ IM)
 Mat Kelor lagi asyik ngedengerin MP3 lagu berjudul irit satu kate aje, "You"; nyang penyanyi sekaligus penciptanye Basil Valdez, orang Filipin. Sambil ngederin, pikirannye jadi melayang-layang inget temen SMA-nye yang dulu pernah deket. Apalagi pas sampe refrain-nye, "It's your smile, your face, your lips that I miss, " Jadi inget lagi ame tuh cewek yang bibirnye emang bagus banget dan empuk kayak tahu.
"Lagu tua gitu kok lu dengerin sih, Mat ? Kagak ada lagu baru yang bagus, ape ?" tegor si Pepen yang gayanye emang sok ngikutin jaman.
Tapi Mat Kelor diem aje, kagak ngejawab ape-ape. Soalnye pikirannye lagi nggak di sono. Pepen jadi penasaran dan merhatiin temennye. Eh, pas lagunye bebunyi, "And if you go, You know the tears can't help but show. You'll break this heart and tear it apart; Then suddenly the madness starts" kelihatan mata si Mat rada berkaca-kaca. Kristal kali...he..he... Ternyata melankolis juga tuh anak.
"Wah lagi nostalgila rupanye nih anak. Mat, Mat, sadar-sadar, nyebut !" kata Pepen sambil ngecuncang-guncang badan temennye. Bukanye ape-ape, kalo pikiran kosong, entar kemasukan bisa berabe. Mau nyari dukun di mane ?
"Gile lu Pen. Lu pikir gue kesambet, ape ? " kata Mat Kelor dengan rada dongkol, "Gue lagi asyik menikmati lagu ini yang baru gue download dari internet. "
"Lagu tua gitu ape enaknye, " bales Pepen karena rada kesel juga maksudnye baek tapi ditanggepin laen.
"Mau lagu baru atawa lama, yang penting kata-katanye same alunan melodinye. Kalau enak, tetap aje enak, nggak bakalan mati ditelen jaman, " kata Mat Kelor menerangkan hipotesanye. "Si Jum tuh favoritnye lebih lama lagi; Layu Sebelum Berkembang. "
"Terang aje itu lagu ngingetin si mpok, bininye si Jum. Masih bau kencur udah buru-buru dipetik si Jum. Dikawinin gara-gara takut kalo nggak buru-buru entar diambil orang, " kata Pepen sambil terkekeh-kekeh.
"Dasar emang keturunan tengkulak. Soal kawin aje pake jurus ijon. Padi baru keluar daonnye udah dibayarin duluan ! “ tambah Mat Kelor sambil ngakak.
“Bini orang lu omongin !” celetuk Jumadi yang otomatis bangun dari terkantuk-kantuk begitu namanye disebut-sebut. “Bini gue biar sekarang udah nggak semuda dulu tapi kagak pernah layu. Jamunye dong !”
“Ngomong-ngomong lu kenape akhirnye kagak jadi ame temen sekolah lu dulu, Mat ?” tanya Pepen karena teringet kisah cinte sohibnye dulu. Kayak filnye Rano Karno aje, Gita Cinta dari SMA.
“Gue ame die sih sama-sama mau. Cuma orangtuenye yang mau muntah kalo ngelihat gue. Katenye gue madesu; masa depan suram. Maunye anaknye dapet anak orang beduit, “ kata Mat Kelor yang tiba-tiba keluar dongkolnye kalo inget peristiwa jaman dulu itu.
“Wajar aje dong. Semua orang tua yang punye anak perempuan maunya kan gitu. Ape mau nantinye ngelihat anaknye hidupnye susah. Buntut-buntutnye pinjem duit mulu sama nyak-babenye, “ kata Jumadi sambil mesem-mesem dan berusaha nenangin hati temennye. “Semua orang tua pasti nasehatin anak perempuannye, kalo jatoh cinte jangan cume ngelihat tampangnye, tapi yang lebih penting lihat dompetnye dong !”
“Bener Jum, emangnye anak orang mau dikasih makan cinte setiap hari ? Nasi ame tempe kan perlu dibeli pake duit, “ tambah Pepen sambil meledak ketawanye, “Makan tuh cinte !”
“Tapi nasib orang siape tau ? Coba kalau anak perempuannye dapetin Mat Kelor, bisa punya cucu orang Amerika. Lahir sini kan otomatis citizen, nggak kayak kite yang masih seiko terus, “ kata Jumadi lagi.
“Iye, Jum. Dibanding di sono naik-turun mikrolet, di sini semiskin-miskinnye orang kite minimal naik-turun Chevrolet !” kata Mat Kelor sambil terbahak-bahak. Lupa dech ame sedihnye.
| 
