RETURN
(Bang Madi/ IM)
 "Hebatnya
Amerika ada consumer protection law. Maksudnye ada perlindungan
bagi hak-hak kite sebagai konsumen. Jadi produsen atawa
penjual kagak bisa sembarangan jual barang yang kagak bener
!" kata Jumadi membuka pembicaraan di sore hari yang
mulai tidak terlalu panas.
"Selain itu kan ada quality control.
Jadi barang yang dijual, harus memenuhi standar. Dimanapun
kita beli barangnya sama. Contohnya aje Wendy's. Dimana-mana
kan rasanya sama, " kata Pepen ikut mendukung pendapat
Jumadi.
"Sekarang lu ngomonginnya Wendy's melulu.
Mentang-mentang tante Alvi, bu lurah kite membelot dari
McDonald ke sono, kite-kite jadi jajannye pindah juga !"
celetuk Mat Kelor yang isengnye mulain timbul.
"Kalo di Indonesia restoran yang namanya sama, rasanye
bisa beda. Yang sebelah sini bisa lebih enak dari yang di
tikungan jalan, " kata Pepen lagi.
"Ayam Suharti aje ada 2 macem. Yang satu
kemasannye gambar ayam, yang satu gambar si embak !"
kata Jumadi nambahin.
"Kalo Jumadi selalu beli yang gambar
ayam, walaupun yang gambar si embak lebih enak, " kata
Mat Kelor yang suka memancing di airrr... ya di air dong,
masa di pasar ?
"Emangnye kenape Mat ? Kok beli yang
kurang enak ? " tanya Pepen yang termakan pancingan
Mat Kelor.
"Yang gambar ayam, kan isinye pasti ayam
! Kalo yang satunye, khawatir nanti salah ngisi. Isinye
si embak, bukannye ayam. Bisa-bisa si Jum dikemplangin bininye
!" jawab Mat Kelor sambil tertawa terbahak-bahak.
"Kepuasan konsumen atas barang yang dibeli
juga sangat diperhatiin di sini. Makanye kalo ternyata kite
nggak suka dengan barang yang kite beli, bisa kite pulangin,
" kata Jumadi mengalihkan pembicaraan ke topik semula,
supaya nggak digodain terus.
"Tapi budaye orang kite suka meleset-melesitin.
Contohnye itu tadi, kata return yang mustinye diterjemahin
pulangin, dipelesetin jadi pinjem. " kata Mat Kelor
sambil mesem-mesem.
"Bener lu, Mat. Itu akal bulusnye orang
kite. Mau jalan-jalan ke Vegas, pinjem video kamera dulu
ah ke Bestbuy. Maksudnye beli, pake, terus abis itu pulangin
!" kata Jumadi sambil terkekeh-kekeh.
"Bener Jum, kalo mau kondangan, ke Nordstrom
dulu minjem baju, " tambah Pepen sambil ngedipin matanye,
ngegodain Mat Kelor.
"Sia'ul lu Pen. Gue bukannye minjem,
tapi gara-gara buru-buru pulang kerja langsung ke kondangannye
bang Erwin, jadi kelupaan ngelepas tag-nye, " kata
Mat Kelor menceritakan pengalamannye. Soalnye biasa kan
orang kite kalau "minjem" baju, tag-nye jangan
dilepas, biar toko nggak cerewet waktu barangnye dipulangin.
"Abis deh gue digodain oom Leo. Katenye, kelihatannye
Mat Kelor bajunye baru nih, nggak setengah maen, alias beli
di yard sale. Tapi kayaknye ini kali, minjem dari Mervyn
!"
"Mangkanye di Indonesia kagak ada cerita
return-return segala. Beli putus, udah, abis tuntas !"
kata Jumadi.
"Kalo nggak, nenek lu minjem panci di
toko, bakal masak-masak mestain khitanan cucunye, "
kata Pepen sambil tertawa geli, "Padahal pantat pancinye
udah item, gara-gara masaknye di atas kompor minyak tanah.
"Ponakan lu si entong, mulangin benang
gelasan, gara-gara ngadu layangan putus mulu. Si abang tukang
layangan jadi kebingungan, kok dipulangin dek, emangnye
kenape ? Si entong ngejawab, abis si abang nggak bisa ngejamin
kupuasan konsumen !" kata Mat Kelor sambil tertawa
geli.
| 
