Labrak
 "Mat,
udah baca Indonesia Media ? Artis Mayangsari dilabrak dan
rumahnye diacak-acak, " tanya Pepen sambil memberikan
majalah kepada Mat Kelor.
"Ah, soal labrak-melabrak kan hal biasa
di negara kite. Udah umum bini tua ngelabrak bini mude !
Kenape musti diributin sih ?" kata Mat Kelor dengan
santai sambil balik bertanya.
"Soalnya menyangkut orang gedean. Dan
kejadiannya sekarang jaman reformasi. Coba kalau dulu, mana
ada yang berani masukin di majalah ? Bisa-bisa wartawannye
dicomot tekab, " jawab Pepen nggak mau kalah.
"Orang Belande bilang apel nggak bakal
jatuh jauh dari pohonnye. Kalau mau tahu peribahasa aslinye,
tanya tuh sama oom-oom en tante-tante van Holland yang biasa
ngumpul di Duarte Sabtu pagi, " sambil gaya ngeluarin
bahasa Belanda biar tahunye cuma seupil.
"Lah, lu sok ngomong Belande. Lu ngomong
Inggris aje, orang sini bolak-balik bilang what...what...,"
kata Pepen ngeledekin temannye.
"Tentu aje pade nggak ngerti. Orang sini
kan bahasa Inggrisnye, bahasa pasar. Kalau gue kan British
English, " kata Mat Kelor nggak mau kalah set.
"Lu cuman numpang daptar kursus bahasa
Inggris aje sombong amat. Padahal gue tahu kartu lu, daptar
doang, kursusnye kagak. Kagak kuat bayar !" balas Pepen
sambil cekakakan. "Enyak lu kan curhat ke enyak gue,
kalo lu minta duit bakal ikut kursus. Kata enyak lu mendingan
tuh anak belajar nukang ape nambel ban daripade ngikut-ngikutan
kursus yang ijazahnye belon tentu bakal jadi duit. Makan
tuh ijazah, katenye. "
"Sia'ul lu. Nah dengerin gue nih. Lu
kalau ke fastfood restaurant pasti bakalan ditanya for here
or for to go ? Dapet grammar darimane tuh ? Mendingan orang
Singapore yang nanyanye bener, dine in or takeaway ?"
kata Mat Kelor mengeluarkan sedikit pengetahuannya. Padahal
dapet ilmunye dari oom Leo yang dulunye suka bolak-balik
ke Singapore.
"Ngomong-ngomong soal apel tadi, maksud
lu ape ?" tanya Pepen karena teringat pembicaraan sebelumnya.
"Sas-susnye dulu kan villa cem-cem-annye
babe di Puncak disemprotin mobil tinja, " kata Mat
Kelor singkat.
"Berarti pinteran mertua dong daripade
mantu. Jurusnye lebih maut pake mobil tinja, dibanding nabrak
pagar sambil bawa-bawa centeng. " kata Pepen.
"Bukan masalah pinteran siape. Seperti
kata lu tadi, Pen. Zamannye udah beda. Sekarang orang lebih
ada kebebasan. Kalo pake mobil tinja, tetangga yang kagak
ada juntrungannye bisa nuntut ke pengadilan gara-gara kebauan
!" kata Mat Kelor sambil cengar-cengir.
"Itulah mangkenye, punya bini satu aje.
Tanya tuh si Jumadi. Bini satu aje bikin rambut pade rontok.
Apalagi lebih dari satu ? Bisa licin tandas seluruh tubuh
kagak ada bulunye barang satu juga, " kata Pepen sambil
tertawa-tawa.
"Sebenarnya punya bini lebih dari satu
itu mission impossible. Syaratnye kan musti adil. Pegimane
bisa adil ? Yang muda wangi bedak, sedang yang tua bau popok
bayi, " samber Mat Kelor.
"Belon lagi soal kulit. Bini muda, kulitnye
sehalus sutera gara-gara pake Nivea terus. Yang tua udah
waktunye disetrika tuh kulit. Kayak horden banyak lipetan-nye,
" kata Pepen sambil terbahak-bahak.
(Bang Madi/ IM)
| 
